“Bu şərəfli iş deyil” - Deputat sərt danışdı
Bu gün Azərbaycandakı radikal müxalifət qrupları Rusiyada yaşayan azərbaycanlıların üzləşdiyi ayrı-seçkilik və sıxışdırılma hallarından hakimiyyətə qarşı istifadə etməyə çalışır. Onlar bu məsələni Kremlin milli siyasətindəki uğursuzluqların göstəricisi kimi təqdim etmək, real faktlar səsləndirmək əvəzinə ölkə daxilində, beynəlxalq aləmdə yanlış ictimai rəy formalaşdırmaq məqsədi güdürlər. Bu yanaşma, bir tərəfdən Azərbaycan diasporunun hüquqlarının müdafiəsi kimi göstərilsə də, əslində daha geniş siyasi təxribatlara xidmət edir.
Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib:
“Azərbaycan tək Rusiyada deyil digər ölkələrdə yaşayan azərbaycanlıların vəziyyətini də daima diqqətdə saxlayır. Digər dövlətlərin daxili işlərinə qarışmadan beynəlxalq hüququn imkan verdiyi şərtlər daxilində həmişə azərbaycanlılarla maraqlanır və mümkün qədər kömək göstərməyə çalışır. Eyni zamanda xaricdə yaşayan azərbaycanlılarda həmin ölkənin qanunlarına hörmətlə yanaşırlar. Əlbəttə ki, diasporumuz, səfirliklərlə əlaqələrimiz daima mövcuddur. O əlaqələr həmvətənlərimizin həmin ölkəyə adaptasiyasında mühüm rol oyanyır. Radikal müxalifətin bu məsələdn istifadə etməsi birinci dəfə deyil. Onlar problemin həll olmasında yox daimi olmasında maraqlıdırlar. Çünki onu Azərbaycanda hakimiyyətə qarşı istifadə edəcəklər. Təbii ki, bu şərəfli iş deyil. Hakimiyyət uğrunda mübarizə sivil qanunlar çərçivəsində və ilk növbədə milli maraqlarımız əsasında getməlidir”.
Ayhan
15:28 15.07.2025
Oxunuş sayı: 795
