Ermənistan Nazirlər Kabineti danışıqların məzmununu açıqlayacaq - Bu, İrəvanı çətin vəziyyətə sala bilər
Ermənistan hökuməti yaxın günlərdə Azərbaycan Prezidenti İlham Əliyev və Ermənistanın Baş naziri Nikol Paşinyan arasında Əbu-Dabidə baş tutmuş son görüşün bəzi məqamlarını ictimaiyyətə açıqlayacağını bildirib. Ermənistan Baş nazirinin aparat rəhbərinin müavini Taron Çaxoyanın sözlərinə görə, danışıqlarda əldə olunan konsensuslar və razılaşdırılmış məsələlər barədə rəsmi bəyanatlar veriləcək, həmçinin bəzi mətnlər açılacaq.
Bəs bu danışıqlar prosesinə necə təsir edəcək?
Mövzu ilə bağlı Crossmedia.az-a açıqlama verən politoloq Oqtay Qasımov bildirib ki, Ermənistan Nazirlər Kabinetinin verəcəyi açıqlama Əbu-Dabidəki görüşdən dərhal sonra Ermənistan XİN-nin və Azərbaycan XİN-nin yaydığı bəyanatdan çox da fərq etməyəcək:
“Ola bilsin ki, bəzi detallar bir qədər geniş formada açıqlansın. Bu baxımdan prosesə mane ola biləcək və ya ona əngəl törədəcək bir açıqlamanın veriləcəyini düşünmürəm. Bu ehtimal çox azdır və ağlabatan görünmür. Çünki belə bir bəyanat Ermənistanı kifayət qədər çətin vəziyyətə sala bilər. Bu səbəbdən hesab edirəm ki, ənənəvi diplomatik dildə müəyyən məsələlərə və məqamlara bir qədər aydınlıq gətirmək şərti ilə açıqlama verilə bilər. Yəni burada xüsusi olaraq prosesə təsir edəcək və onu poza biləcək bir açıqlamanın olacağını düşünmürəm”.
Nəzrin Salmanova
18:10 14.07.2025
Oxunuş sayı: 6970
