Beynəlxalq miqyasda Azərbaycana inanırlar: "Prezident İlham Əliyev bu nəticəyə gecəsini gündüzünə qataraq nail olub"
Son 40 gün ərzində Azərbaycanın beynəlxalq arenada qazandığı diplomatik uğurlar diqqətçəkən və strateji baxımdan əhəmiyyətli hadisə kimi dəyərləndirilir. Beynəlxalq təşkilatlar çərçivəsində keçirilən və Azərbaycan dövlətinin vətəndaşlarının namizəd olduğu altı mühüm seçkidə ölkəmiz bütün hallarda qalib gəlib. Bu qələbələr Azərbaycanın diplomatik çevikliyinin, beynəlxalq əlaqələr sistemində artan rolunun və düzgün xarici siyasət strategiyasının bariz nəticəsidir. Həmçinin, bu nailiyyətlər dünya ictimaiyyətinin Azərbaycana artan etimadının, siyasi sabitlik və etibarlı tərəfdaş imicinin bir göstəricisidir. Azərbaycanın beynəlxalq təşkilatlarda mövqeyinin güclənməsi təkcə nüfuz məsələsi deyil, eyni zamanda ölkəmizin qlobal qərarvermə proseslərinə daha fəal şəkildə təsir imkanlarının artması deməkdir. Bu, həm də Azərbaycanın regional əməkdaşlığa verdiyi töhfənin, münaqişələrin həllində və sülh təşəbbüslərində tutduğu mövqenin təqdir olunmasının nəticəsidir. Bütün bunlar bir daha göstərir ki, Azərbaycanın diplomatik xətti təkcə milli maraqları qorumağa deyil, həm də beynəlxalq miqyasda sülh, inkişaf və əməkdaşlıq platformalarının qurulmasına xidmət edir.
Mövzuyla bağlı Milli Məclisin deputatı Azər Badamov Crossmedia.az-a açıqlama verib:
“Beynəlxalq münasibətlərdə aktorlar arasındakı əlaqələr inamdan, formalaşdırılan imicdən asılıdır. Dövlətlərarası münasibətlərdə olduğu qədər beynəlxalq təşkilatlarla münasibətlərdə də etimad vacib amildir. Etibarlı münasibətlər gələcəyi daha dəqiq müəyyən etməyə, proqnozlaşdırıla bilən etməyə imkan verir. Sövdələşmələrin hər birinin mərkəzində güvən olmadan bir sıra fəaliyyətlər mümkün olmasa da bu, birmənalı təhlükəli olur. Eyni şey daha geniş miqyasda və sonrasında millətlər arasında etimad çatışmazlığına doğru gedir. Beynəlxalq münasibətlərdə etimadın mövcud olduğu yerdə yaxşılığa doğru hər cür əməkdaşlıq davranışı mümkündür. Bu əməkdaşlıq əsasən iqlim dəyişikliyi, ərzaq təhlükəsizliyi və beynəlxalq münaqişə kimi problemlər olmaqla dövlətlərdən kollektiv yanaşma tələb edir. Çünki COVID-19 pandemiyası, davam edən iqlim dəyişikliyi və müharibənin Avropaya qayıdışı kimi məsələlər qeyri-sabitlik və narahatlığa səbəb olub. Bu hadisələr həm də bütün dünyada etibar səviyyəsinin aşağı düşdüyü bir dövrdə baş verib. Beynəlxalq siyasi sistemin onilliklər ərzində ən kövrək mənzərə yaratdığını görürük, dövlətlər, millətlər və qlobal “Şimal” və “Cənub” arasında etimadın azaldığı bir dövrdə yaşayırıq”.
Deputat həmçinin bildirib ki, Prezident İlham Əliyev çıxışlarında hər zaman bildirir ki, biz bu iki uzaq məsafə arasında körpü rolunu oynayırıq: "Burada bir xüsusi amil də mövcuddur ki, etimadın yaradıldığı və hansı yolla qorunduğu prosesinin özünü də başa düşmək çox vacibdir. Azərbaycan dövləti son illərdə atdığı addımlarla sübut edir ki, prosesi aydın dərk etməklə yanaşı, məsələlərə reaktiv deyil, proaktiv yanaşma ortaya qoymağı bacarır. Son qırx gün içində beynəlxalq təşkilatlar çərçivəsində keçirilmiş, Azərbaycan və onun vətəndaşlarının namizəd olduğu altı seçkidən hamısında qələbə qazanmağımız bunu empirik şəkildə sübut edən amildir. Bu, birmənalı olaraq dövlətimizə artan güvəndən xəbər verir. Dövlətin sərt gücünün inkişaf etdirilməsi vacibdir. Güvən isə yumşaq güclə ayrılmaz şəkildə əlaqəlidir. Hökumətlər beynəlxalq miqyasda etimad yaratmağa çalışır və mədəniyyət institutları vasitəsilə bunu edirlər. Azərbaycan dövlətin institutları və dövlət qurumları dövlət başçımızın tapşırıq və tövsiyələrini ardıcıl, koordinasiyalı və sistemli şəkildə icra edir. Turizm, mədəni özünüifadə müxtəlifliyinin qorunması, əməkçi miqrantlar, ətraf mühit, mülki müdafiə kimi çoxşaxəli sahələr üzrə bizə göstərilən etimad ondan xəbər verir ki, Azərbaycan öz reallıqlarına paralel olaraq qlobal nizamı, bəşəriyyəti narahat edən məsələlər üzrə əməli addımlar atır”.
A.Badamov Prezident İlham Əliyevin bu uğurlarda olan danılmaz rolundan danışıb:
“Beynəlxalq münasibətlərin istənilən aktoru arasında etimad müsbət əməkdaşlıq üçün ilkin şərtdir, etimadın pozulması isə antaqonizmin, münaqişənin qaçılmaz xəbərçisidir. Etimad və inam xarici siyasətdə, iqtisadiyyatda, qlobal kollektiv fəaliyyət məsələlərində önəmli amildir. Bu, dövlətin üzqabığı deməkdir. Bunu formalaşdırmaq isə qısa müddətin işi deyil. Cənab Prezident İlham Əliyev bu nəticəyə gecəsini gündüzünə qataraq nail olub. Güvən yavaş-yavaş əldə edilə, lakin tez də itə bilər. Məhz bunu qoruyub saxlamaq lazımdır. Bir daha sübut olunur ki, dövlət başçımız konseptual və nəzəri iş ortaya qoyur, Azərbaycanın imzasını imzalar içində fərqləndirən Ümummilli Liderimiz Heydər Əliyevin siyasətini tam və bütöv icra edir”.
Ayhan
18:03 12.07.2025
Oxunuş sayı: 20369
