Azərbaycan-Suriya əlaqələrində yeni inkişaf mərhələsi yaşanır — Deputat
İyulun 12-də Azərbaycan Respublikasının Prezidenti İlham Əliyev ilə Suriya Ərəb Respublikasının keçid dövrü Prezidenti Əhməd Əl Şaraa arasında geniş tərkibdə görüş keçirilib. Rəsmi qarşılanma mərasimindən sonra baş tutan görüş, iki ölkə arasında uzun illər durğun olmuş münasibətlərə yeni nəfəs verib. Görüş zamanı siyasi, iqtisadi, enerji və humanitar sahələrdə əməkdaşlığın perspektivləri geniş müzakirə olunub. Azərbaycan Prezidenti İlham Əliyev Suriyanın yeni rəhbərliyi ilə ikitərəfli əlaqələrin inkişafına böyük ümidlər bəslədiyini bildirib. Əhməd Əl Şaraa isə ölkəsinin Azərbaycanla hərtərəfli əməkdaşlıqda maraqlı olduğunu vurğulayaraq, energetika böhranının həllində Azərbaycanın rolunu yüksək dəyərləndirib.
Bu görüş bölgədə əməkdaşlıq dinamikasının dəyişdiyini və Bakı ilə Dəməşq arasında qarşılıqlı etimada əsaslanan yeni münasibətlər modelinin formalaşdığını göstərir.
Mövzu ilə bağlı Crossmedia.az-a açıqlama verən Milli Məclisin deputatı Pərvanə Vəliyeva bildirib ki, bundan əvvəl, Azərbaycan və Suriya prezidentləri Antaliyada keçirilən forum zamanı bir araya gəlib, iki ölkə arasındakı münasibətlərin inkişafı üçün müzakirələr aparılıb:
“Bu görüşdə Azərbaycan tərəfindən Suriyanın ərazi bütövlüyü və suverenliyinə dəstək ifadə edilib. Suriyanın yeni hakimiyyəti dövründə Azərbaycan, Türkiyə ilə birlikdə bu ölkənin inkişafına və bərpa-quruculuq prosesinə töhfə verməyə hazır olduğunu bildirib. Prezident İlham Əliyevin tapşırığına əsasən, Baş nazirin müavini Samir Şərifovun rəhbərlik etdiyi nümayəndə heyəti və Xarici İşlər Nazirliyinin nümayəndələri Suriyada səfərdə olub, Azərbaycan tərəfindən bu ölkənin bərpa və quruculuğuna necə dəstək verilə biləcəyini müzakirə ediblər. Azərbaycan, ərazi bütövlüyünü və suverenliyini tam bərpa etdikdən sonra qlobal xarici siyasət konsepsiyasına keçərək geniş coğrafiyalarda fəal xarici siyasət yürütməyə başlayıb. Prezident İlham Əliyevin şəxsi nüfuzu, ölkəmizə yeni tərəfdaşlıq modelləri gətirməkdə və yeni müttəfiqlər qazanmaqda önəmli rol oynayıb. İşğala son qoyduqdan sonra, Azərbaycan apardığı genişmiqyaslı bərpa-quruculuq işləri nəticəsində bu sahədə unikal təcrübə toplayıb. Bu təcrübə Suriya üçün də faydalı ola bilər. Tarixən Azərbaycanla Suriya arasında yaxşı əlaqələr olub, lakin əvvəlki rəhbərlik bu əlaqələrin inkişafına mane olub. Ümumilikdə, hazırda Azərbaycan-Suriya əlaqələrində yeni inkişaf mərhələsi yaşanır. Bu, həm strateji əməkdaşlığı, həm də iqtisadi əlaqələri əhatə edən çoxşaxəli bir müstəvidə baş verir. Hər iki ölkə üçün faydalı olan bu əməkdaşlıq, Yaxın Şərq regionunda sabitliyin bərqərar olmasına da öz müsbət təsirini göstərə bilər”.
Nəzrin Salmanova
18:59 12.07.2025
Oxunuş sayı: 2500
