"Azərbaycan Suriyanın bərpasında Türkiyə ilə birgə iştirak etmək istədiyini bildirib" - Deputat
Suriya prezidentinin Azərbaycana rəsmi səfəri regionlararası əməkdaşlıq baxımından mühüm hadisə kimi qiymətləndirilir. Bu səfər, tərəflər arasında humanitar, siyasi və iqtisadi sahələrdə mümkün tərəfdaşlıqların müzakirəsi üçün yeni imkanlar aça bilər. Azərbaycanın beynəlxalq platformalarda artan rolu və humanitar diplomatiya sahəsindəki təşəbbüsləri fonunda, bu səfər iki ölkə arasında münasibətlərin gələcək inkişaf perspektivləri baxımından maraq doğurur.
Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib:
“Azərbaycan Suriyada baş verən hakimiyyət dəyişikliyini Suriyanın daxili məsələsi hesab etdi. Yeni hökümətlə normal münasibətlər qurdu. Uzun illərdir fəaliyyət göstərməyən səfirliyimiz öz fəaliyyətini bərpa etti. Suriya rəsmiləri ilə Azərbaycan rəsmiləri vaxtaşırı görüşlər keçirdi. Suriya prezidentinin Azərbaycana səfəri isə dövlətlərimiz arasında hər zaman olan lakin əvvəlki administrasiya dönəmində pozulan münasibətləri bərpa etmək istəyindən xəbər verir. Bizim tariximizdə ümumi səhifələr çoxdur. Eyni zamanda mədəniyyətimiz və humanitar sahədə fəaliyyətimiz də hər iki ölkənin tarixini bəzəyir. Azərbaycan Suriyada hakimiyyət dəyişdikdən sonra bu məsələyə qardaş Türkiyə ilə eyni mövqedən yanaşaraq Suriyanın bərpasında Türkiyə ilə birgə iştirak etmək istədiyini bildirdi. Azərbaycan neft-qaz, maşınqayırma, kənd təsəsrrüfatı, kommunal sahələrdə olan təcrübəsini Suriya ilə bölüşə bilər. Bu baxımdan Suriya liderinin Azərbaycana səfəri birgə fəaliyyət sahələrini nəzərdən keçirməyə və ən əsası xalqlarımız arasında olan dostluğu möhkəmləndirməyə xidmət edir”.
Ayhan
16:10 12.07.2025
Oxunuş sayı: 857
