"Azərbaycan reallığında qadınların orduya çağırılması zərurəti yoxdur" - Deputat
Son illərdə qlobal miqyasda artan təhlükəsizlik təhdidləri və geosiyasi gərginliklər bir çox ölkələri müdafiə siyasətlərində ciddi dəyişikliklərə getməyə vadar edib. Danimarkanın 2026-cı ildən etibarən qadınları da məcburi hərbi xidmətə cəlb etməsi bu istiqamətdə atılmış mühüm addımlardan biridir. Bu qərar təkcə hərbi qüvvələrin gücləndirilməsi deyil, həm də gender bərabərliyi və cəmiyyətin bütün təbəqələrinin milli müdafiəyə cəlb olunması baxımından diqqətəlayiqdir. Dünyanın müxtəlif ölkələrində – o cümlədən İsrail və ABŞ-da – bu modelin uğurlu nümunələri mövcuddur. Bəs Azərbaycanda belə bir yanaşmaya ehtiyac varmı?
Mövzu ilə bağlı Milli Məclisin deputatı, Ana Vətən Partiyasının sədr müavini Günay Ağamalı Crossmedia.az-a açıqlama verib: “Son dövrlərdə bəzi ölkələrdə, o cümlədən Danimarkada qadınların məcburi hərbi xidmətə cəlb olunması məsələsi gündəmə gəlib. Lakin Azərbaycan reallığında bu zərurət yoxdur. Çünki Azərbaycan Ordusu şərəfli və igid oğullarımızın qəhrəmanlığı ilə Vətənimizi qorumağa qadirdir. Qadınlarımız Cənab Prezident İlham Əliyevin yüksək diqqət və qayğısı ilə cəmiyyətin inkişafında, təhsildə, səhiyyədə, elmdə və ailə institutunun möhkəmləndirilməsində önəmli rol oynayır. Azərbaycan qadını şəfqətin, zərifliyin və mənəvi dəyərlərin daşıyıcısıdır. Bu gün Azərbaycan müstəqil, güclü və qalib dövlətdir. Ordumuzun qüdrəti, oğullarımızın fədakarlığı qadınlarımızı döyüş meydanına çıxmağa ehtiyac və zərurət yaratmır. Bizim gücümüz həm silahda, həm ailədə, həm cəmiyyətdə həm də mənəviyyatda təzahür edir. Qızlarımız Vətən üçün döyüşkən ruhda böyüyür, amma silaha yox, elmə, inkişafa və vətən sevgisinə sarılır. Analarımız isə igid oğullarımızı vətənpərvərlik ruhunda böyüdür”.
Ayhan
13:10 12.07.2025
Oxunuş sayı: 28049
