Qeyri-formal və informal təhsilin qiymətləndirilməsi və tanınması istiqamətində tədbirlər davam etdirilir
Bərdə rayonunda Təhsildə Keyfiyyət Təminatı Agentliyi (TKTA) ilə Qaçqınların və Məcburi Köçkünlərin İşləri üzrə Dövlət Komitəsinin tərəfdaşlığı çərçivəsində xüsusilə “Accelerated Career Academy” tərəfindən təlimlərə cəlb olunmuş “Qənnadıçı, şirniyyatçı”, “Bərbər-vizajist-manikürçü” və “Dərzi” ixtisasları üzrə ümumilikdə 21 müraciətçinin müvafiq peşə ixtisasları üzrə qeyri-formal və informal yollarla əldə etdikləri bilik, bacarıq və təcrübələrinin TKTA tərəfindən qiymətləndirmə və tanınması həyata keçirilib.
Bu barədə Crossmedia.az TKTA-ya istinadən məlumat verir.
TKTA-nın Hüquq təminatı departamentinin direktoru Vüqar Bağırlının sədrlik etdiyi Qiymətləndirmə Komissiyasının tərkibi Dövlət Məşğulluq Agentliyinin İdarə Heyəti sədrinin müşaviri Fuad Mehdizadə və işəgötürən qismində Bərdə Peşə Təhsili Mərkəzinin direktoru Samir Nəcəfovdan ibarət olub.
Sahə üzrə müstəqil ekspert qismində Bərdə Peşə Təhsili Mərkəzinin müəllimləri - “Qənnadıçı,şirniyyatçı” peşə ixtisası üzrə Nərgiz Əbdülova, “Bərbər-vizajist-manikürçü” peşə ixtisası üzrə Günel Ərəbova, “Dərzi” peşə ixtisası üzrə isə Rəsmiyyə Nəzərova iştirak ediblər.
Qarabağ Peşə Hazırlığı Mərkəzində keçirilən müvafiq peşə ixtisasları üzrə nəzəri imtahanda iştirak edən 21 namizəddən 14-ü uğurlu nəticə göstərərək, növbəti mərhələ olan praktiki imtahana dəvət olunublar. Müvafiq peşə ixtisasları üzrə praktiki imtahanda uğurlu nəticə əldə edən namizədlər peşə ixtisasını təsdiq edən müvafiq sənəd əldə edəcəklər.
Qeyd edək ki, sözügedən fəaliyyətin əsas məqsədi vətəndaşların əmək bazarında özünüməşğulluq imkanlarının artırılmasına və bu sahədə həyata keçirilən dövlət siyasətinə dəstək göstərməkdən ibarətdir.
Xatırladaq ki, agentlik tərəfindən təqdim edilən diplom və sertifikat Azərbaycan Respublikasının Nazirlər Kabinetinin 2020-ci il 5 avqust tarixli Qərarına əsasən, sahibinə peşə ixtisasi üzrə əmək fəaliyyətinə başlamaq, eyni zamanda diplom ilk peşə təhsili səviyyəsində təhsil haqqında sənədə bərabər tutulur, peşə təhsili pilləsinin növbəti səviyyəsində təhsilini davam etdirmək hüququ verir.
19:26 10.07.2025
Oxunuş sayı: 7484
