Ermənistan Zəngəzur dəhlizini açmağa razılaşdı
Ermənistan Xarici İşlər nazirinin müavini Mnaçakan Safaryan Zəngəzur dəhlizi ilə bağlı mühüm açıqlama verib. O, “Azadlıq Radiosu”nun Ermənistan xidmətinə verdiyi müsahibəsində regional kommunikasiyaların açılması funksiyalarının beynəlxalq təşkilatlara verilməsinin mümkün olduğunu bildirib.
Crossmedia.az xəbər verir ki, Safaryan belə bir variantın yalnız Ermənistanın bəyan etdiyi prinsiplərə tam uyğun olduğu halda həyata keçirilə biləcəyini açıqlayıb. O, beynəlxalq nəzarətin təmin edilməsinin regionda sabitlik və təhlükəsizliyin möhkəmlənməsinə kömək edəcəyini vurğulayıb.
Safaryanın sözlərinə görə, Ermənistan regional kommunikasiyaların açılmasını dəstəkləyir, lakin bu prosesdə ölkənin suverenliyinə və milli maraqlarına hörmətlə yanaşılması vacibdir. O əlavə edib ki, Ermənistan üçün əsas məsələ Zəngəzur dəhlizinin hər hansı bir formada suverenlikdən imtina anlamına gəlməməsidir.
Diplomatın bu açıqlaması regionda davam edən gərginlik fonunda beynəlxalq diqqəti cəlb edib və Zəngəzur dəhlizinin gələcək statusuna dair yeni müzakirələrə səbəb olub.
Fidan Qarayeva
15:51 10.07.2025
Oxunuş sayı: 7363
