"İlham Əliyev bu cür görüşlərdə göstərdiyi etiket qaydaları ilə hər zaman yüksək qiymətləndirilib" - Deputat
Abu-Dabidə Ermənistan Baş naziri Paşinyanla görüş zamanı Prezident İlham Əliyevin erməni nümayəndə heyəti ilə səmimi şəkildə görüşməsi və hər bir üzvlə əl sıxması iki ölkə arasında diplomatik münasibətlərin yeni mərhələyə qədəm qoyduğunu nümayiş etdirir. Dövlət başçısının nümayiş etdirdiyi bu diplomatik jest, təkcə yüksək siyasi mədəniyyət nümunəsi deyil, eyni zamanda sülh və konstruktiv dialoqa sadiqliyin aydın ifadəsi kimi qiymətləndirilə bilər. Prezidentin bu davranışı beynəlxalq münasibətlərdə örnək sayıla biləcək bir addım kimi qəbul oluna bilər. Məhz bu jestin ardından Ermənistanın Baş naziri Nikol Paşinyan da Azərbaycanın nümayəndə heyəti ilə eyni cür münasibət sərgilədi. Bu hadisə, qarşılıqlı etimadın və dialoqun qurulması baxımından əhəmiyyətli bir siyasi mesaj kimi dəyərləndirilir.
Milli Məclisin deputatı Aydın Mirzəzadə mövzu ilə bağlı Crossmedia.az-a açıqlama verib: "Cənab prezident yüksək peşəkarlığa malik dövlət xadimidir. Prezident İlham Əliyev Azərbaycan xalqının yüksək mədəni dəyərlərinə malik olan və nümunə göstərilən şəxsiyyətdir. Bu gün İlham Əliyev dünyada tanınan və qəbul olunan siyasi xadimdir. O, bu cür görüşlərdə göstərdiyi etiket qaydaları ilə hər zaman yüksək qiymətləndirilib. Bu gün Abu-Dabidə olan görüşlərdə də İlham Əliyev Azərbaycan xalqının yüksək mədəniyyətini nümayiş etdirdi”.
Ayhan
11:57 10.07.2025
Oxunuş sayı: 1059
