Əliyev və Paşinyan görüşür - "İki rəhbər arasında bir sıra gərginliklərə aydınlıq gətirmək üçün imkan olacaq" - Komitə sədri
Azərbaycan Prezidenti İlham Əliyev və Ermənistanın Baş naziri Nikol Paşinyan arasında Dubayda keçirilməsi gözlənilən görüş regional gündəmin əsas mövzularından birinə çevrilib. Bu görüşün yalnız iki ölkə deyil, bütövlükdə Cənubi Qafqaz üçün ciddi siyasi nəticələr doğuracağı gözlənilir.
Mövzunu Crossmedia.az-a şərh edən Milli Məclisin Müdafiə, təhlükəsizlik və korrupsiya ilə mübarizə komitəsinin sədri, deputat Arzu Nağıyev bu görüşün əhəmiyyətindən, sülh müqaviləsinin perspektivlərindən və gündəmdə olan əsas məsələlərdən danışıb: "Azərbaycan Prezidenti Cənab İlham Əliyev və Ermənistan Baş naziri Nikol Paşinyan arasında Dubayda baş tutacaq görüş çox mühümdür. Çünki bu gün Ermənistan daxilində baş verən hadisələr, siyasi gedişlər, eyni zamanda 2026-cı ildə Ermənistanda baş tuta biləcək seçkilərə görə olan təziqlər fonunda keçirilən görüş Ermənistan üçün də mühüm əhəmiyyət kəsb edir. Məlumdur ki, Azərbaycanı maraqlandıran əsas məsələ sülh müqaviləsinin imzalanması və regionda sülhün bərqərar olmasıdır. Azərbaycan tərəfi təbii ki, bir neçə məsələləri şərt olaraq irəli sürüb. Yəni, bugün bu görüşdə düşünürəm ki, deklarativ bəyanatlar deyil, artıq imzalana biləcək müqavilənin detalları və onun necə həyata keçirilməsi məsələsi əsas müzakirə obyekti olacaq. Hazırda Azərbaycan Ermənistan Konstitusiyasında dəyişiklər, eyni zamanda Avropa İttifaqının vizual kəşfiyyatçılarının sərhəddə apardığı müşahidələr, bunun aradan qaldırılması və ATƏT-in Minsk Qrupunun ləğvi ən mühüm məsələlərdən biridir. Hər üç məsələyə Ermənistan aydınlıq gətirməlidir və bu proseslər öz həllini tapmalıdır".
Deputat qeyd edib ki, əsas problemlərdən biri Zəngəzur dəhlizinin açılmasıdır: "Bu mövzuda Ermənistanın da mövqeyi məlumdur. Bunun hansısa problemlərdən qaynaqlanaraq ləngidilməsi, eyni zamanda Rusiyanın, İranın, digər dövlətlərin mövqeyi məsələsi bugün açıq qalır. Azərbaycanın birmənalı şəkildə tələbi odur ki, Zəngəzur dəhlizi açılmalıdır. Həmçinin, Ermənistanın konstitusiyada dəyişikliyi necə edəcəyi, burada siyasi məsələlərdə Ermənistan seçicisinin özünü necə aparacağı, bu proseslərdə Türkiyənin rolu, Orta Dəhlizin həm region həm beynəlxalq səviyyədə hansı müsbət cəhətlərinin olması müzakirə olunacaq. İki rəhbər arasında bir sıra gərginliklərə aydınlıq gətirmək üçün imkan olacaq".
A.Nağıyev Ermənistandakı 2026-cı il seçkilərinə qədər bu sülh müqaviləsi imzalanma ehtimalının aşağı olduğunu vurğulayıb: "Çünki konstitusiyada dəyişiklik olmasa, bu problem yenidən qalxa bilər, hətta Ermənistan parlamentində ratifikasiyadan keçməz. Bu proses mütləq öz əksini tapmalıdır və Paşinyan əgər bu addımları atmağa razıdırsa, sülh müqaviləsinin imzalanması da o vaxta qala bilər. Bu, Ermənistanda baş verən daxili siyasətin və Avropa İttifaqının, eyni zamanda Qərbin, Rusiyanın təkidi və təsirindən də asılıdır. Azərbaycan bugün öz daxili və xarici siyasətini müstəqil şəkildə həyata keçirir.
Prezidentimizin tapşırığına uyğun olaraq istər xarici siyasətdə, istər daxili siyasətdə islahatlar gedir. Ona görə də bu proseslərdə əsas məqam kimi, əsas diqtə edən tərəf kimi Azərbaycan olduğunu biz bir daha görürük və bu, aparlan stabil siyasətin təzahürüdür".
Fatimə Məmmədova
15:29 09.07.2025
Oxunuş sayı: 2110
