" Zəngəzur dəhlizi region üçün strateji əməkdaşlığın açarı ola bilər" - RƏY
Türkiyənin hakim Ədalət və İnkişaf Partiyası (AKP) sədrinin müavini Kürşad Zorlu sosial media hesabında, "İqtisadi Əməkdaşlıq Təşkilatının Zirvə Toplantısında xüsusilə Zəngəzur dəhlizi ilə bağlı birgə səylərimiz ölkəmiz və türk dünyası üçün tarixi prosesdir" - deyə yazıb. Zəngəzur dəhlizi türk dövlətləri arasında geosiyasi və geoiqtisadi əlaqələrin dərinləşməsində mühüm rol oynaya bilər. Bu layihə yalnız regionun nəqliyyat xəritəsini dəyişmək deyil, həm də türk dövlətlərinin iqtisadi və siyasi inteqrasiyasını gücləndirmək potensialına malikdir.
Məlum olduğu kimi, Zəngəzur dəhlizi təkcə Azərbaycanı maraqlandıran məsələ deyil. Digər bir çox ölkə kim, Türkiyə də bu məsələdə birbaşa maraqlıdır.
Zəngəzur dəhlizinin perspektivi və regional əhəmiyyəti barədə Crossmedia.az-a danışan AMEA-nın elmi işçisi, siyasi şərhçi Vüsalə Gülmalıyeva bildirib ki, Zəngəzur dəhlizi Türk dünyasını birləşdirən strateji və iqtisadi əhəmiyyətə malik layihədir: "Zəngəzur dəhlizi sadəcə nəqliyyat infrastrukturundan ibarət bir layihə deyil. Bu dəhliz eyni zamanda Türk dünyasının iqtisadi, siyasi və strateji inteqrasiyasına real zəmin yaradan bir geopolitik layihədir. İlk növbədə, bu yol Azərbaycanla Naxçıvanı birləşdirməklə yanaşı, Türkiyə və Mərkəzi Asiya dövlətlərini də birləşdirən mühüm bir keçidə çevriləcək. Bu baxımdan, Türk Dövlətləri Təşkilatının üzvləri arasında həm ticarət dövriyyəsi, həm də insan və enerji axını baxımından əhəmiyyətli bir sıçrayış gözlənilir".
V.Gülmalıyeva Zəngəzur dəhlizinin açılmasını həm iqtisadi, həm də geosiyasi baxımdan region üçün strateji əhəmiyyət kəsb etdiyini qeyd edib: "Dəhlizin açılması Orta Dəhliz marşrutunu da canlandırır – yəni Çinlə Avropanı birləşdirən alternativ nəqliyyat xətti möhkəmlənir. Bu isə region ölkələri üçün əlavə iqtisadi imkanlar, Qərb və Şərq arasında daha balanslı mövqe deməkdir. Digər tərəfdən, Zəngəzur dəhlizinin açılması Cənubi Qafqazda güc balansına da təsirsiz ötüşməyəcək. Azərbaycan və Türkiyə bu layihə ilə regionda geosiyasi və nəqliyyat baxımından önəmli təşəbbüskar olaraq çıxış edirlər".
O vurğulayıb ki, Zəngəzur dəhlizi region üçün strateji əməkdaşlığın açarı ola bilər: "Bu, həm Ermənistan üçün yeni inteqrasiya imkanları, həm də İran və Rusiya kimi aktorlar üçün diqqətlə izlənən bir prosesdir. Bütün bunların fonunda mən deyərdim ki, Zəngəzur dəhlizi həm fiziki yolları birləşdirir, həm də mədəni, siyasi və iqtisadi mənada Türk dünyasının birliyi ideyasını praktikaya çevirir. Əgər bu layihə uğurla reallaşarsa, bu, təkcə Azərbaycan üçün deyil, bütün region üçün uzunmüddətli və dayanıqlı əməkdaşlıq modelinin başlanğıcı ola bilər".
Fatimə Nəbiyeva
12:40 08.07.2025
Oxunuş sayı: 9433
