Zatulin Qarabağın əhəmiyyətini etiraf etdi: “Kiçik bir kərpic çıxarıldı və hər şey dağıldı”
Rusiya Dövlət Dumasının deputatı, azərbaycanofob mövqeyi ilə tanınan Konstantin Zatulin Qarabağla bağlı qalmaqallı açıqlama verib. O, “MK” nəşrinə müsahibəsində bildirib ki, Cənubi Qafqazda sabitliyin pozulmasının əsas səbəbi Qarabağ məsələsinin arxa plana atılması və bu ərazinin itirilməsi olub.
Crossmedia.az xarici mediaya istinadən bildirir ki, Zatulin müsahibəsində deyib: “Kiməsə elə gəlirdi ki, Qarabağ heç kimin ehtiyac duymadığı bir şeydir. Bir çoxları gəzir və deyirdi: bu, bizim məsələmiz deyil, bu, ermənilərin işidir. Cənubi Qafqaz adlı binadan bu kiçik kərpic çıxarıldı və hər şey dağıldı. Paşinyan dövründə Ermənistanı itiririk, amma əvəzində heç bir Azərbaycan qazanmırıq. Bütün bunlar piramidanın təməlindən kiçik bir kərpicin çıxarılması səbəbilə baş verdi. Mən bu barədə 20-30 il ərzində danışmışam”.
Qeyd edək ki, Zatulinin bu açıqlamaları Azərbaycanda geniş rezonans doğurub. Ekspertlər və ictimaiyyət nümayəndələri xatırladıblar ki, Qarabağ sadəcə geosiyasi element deyil, azərbaycanlıların etnik təmizləməyə məruz qaldığı tarixi vətənidir. Bu ərazi Azərbaycanın qanı və ağrısı, milli kimliyinin bir parçasıdır.
Azərbaycan cəmiyyəti və analitiklər vurğulayırlar ki, Rusiya bu proseslərdə sadəcə müşahidəçi olmayıb, eyni zamanda uzun illər ərzində işğala dolayısıyla dəstək verib. Buna baxmayaraq, Azərbaycan 2020-ci ildə Vətən müharibəsində öz torpaqlarını geri alaraq tarixi ədaləti bərpa edib.
Müşahidəçilər bildirirlər ki, Rusiya Cənubi Qafqazda nüfuzunu Qarabağın azadlığına görə deyil, illərlə bölgədə apardığı ikili standartlara və qeyri-obyektiv siyasətə görə itirib. İndi regionda qaydalar dəyişib və Moskvanın bu yeni reallıqda təsir gücü ciddi şəkildə azalıb.
Fatimə Nəbiyeva
10:11 06.07.2025
Oxunuş sayı: 8285
