Azərbaycan rusiyalı milyarder Konstantin Malofeyevin ölkəyə girişini qadağan etdi
Azərbaycan Rusiyanın tanınmış iş adamı və media maqnatı Konstantin Malofeyevi “persona non grata” elan edib və onun ölkəyə girişinə qadağa qoyub.
Crossmedia.az xarici mediaya istinadən bildirir ki, bu qərarın verilməsinə səbəb Malofeevə məxsus “Tsargrad” media resursunda Azərbaycan hakimiyyəti barədə yayımlanan dezinformasiya və Rusiyada azərbaycanlılara qarşı zorakılığı haqlı çıxaran təbliğat materialları olub. Rəsmi Bakı hesab edir ki, bu cür yayımlar ölkənin imicinə zərbə vurur və milli həmrəyliyi hədəfə alır.
Məlumata görə, Malofeev Azərbaycanın qərarına sərt reaksiya verib. Lakin qəbul olunmuş qərarın dəyişdirilməsi mümkün deyil və apellyasiya proseduru nəzərdə tutulmur. Qeyd edək ki, Azərbaycan bu kimi hallarda xüsusi “qara siyahı” tərtib edir və həmin siyahıya daxil edilən şəxslərin ölkəyə daxil olması daimi olaraq qadağan edilir. Siyahıya əsasən, siyasi fiqurlar, jurnalistlər və ictimai fəallar daxildir.
Azərbaycan hökumətinin bu addımı ölkənin informasiya təhlükəsizliyinə və milli maraqlarının müdafiəsinə yönəlmiş ardıcıl siyasətinin tərkib hissəsi kimi qiymətləndirilir.
Fatimə Nəbiyeva
10:06 06.07.2025
Oxunuş sayı: 7797
