"Dövlət və özəl iştirakın paralel modeli formalaşır" - Hüquqşunas açıqladı
Xüsusi icra məmurları ilə bağlı yeni qanun layihəsi gündəmdədir. Milli Məclisin iyulun 4-də keçiriləcək iclasının gündəliyinə daxil edilən “Xüsusi icra məmurları haqqında” yeni Qanun layihəsi icra sahəsində mühüm hüquqi yeniliyi nəzərdə tutur. Layihənin əsas məqsədi xüsusi icra məmurlarının hüquqi statusunu müəyyənləşdirmək, onların fəaliyyət mexanizmini tənzimləmək və bu sahədə peşəkarlıq, məsuliyyət və şəffaflıq prinsiplərini gücləndirməkdir.
Mövzu ilə bağlı hüquqşünas Əlövsət Allahverdiyev Crossmedia.az-a açıqlama verib:
"Milli Məclisin iyulun 4-də keçiriləcək iclasının gündəliyinə daxil edilən “Xüsusi icra məmurları haqqında” yeni qanun layihəsinə əsasən, xüsusi icra məmuru – bu qanunla müəyyən olunmuş məhkəmələrin və digər səlahiyyətli orqanların qərar və sənədlərinin icrasını həyata keçirmək üçün xüsusi icra məmuru şəhadətnaməsi almış fiziki şəxs sayılır. Yəni, bu şəxslər dövlət qulluqçusu statusunda olmadan, amma rəsmi şəhadətnamə və hüquqi əsasla fəaliyyət göstərirlər. Onların fəaliyyəti məhkəmə qərarlarının, icra sənədlərinin və qanunla nəzərdə tutulan digər öhdəliklərin yerinə yetirilməsinə yönəlmişdir.
Bu həm də göstərir ki, xüsusi icra məmurlarının statusu sıravi fiziki şəxsdən fərqlənir: onlar xüsusi hüquqi rejimə malikdirlər, dövlət tərəfindən sertifikatlaşdırılır və onların fəaliyyətinə dair normativ nəzarət sistemi mövcuddur. Bu, əslində, icra orqanlarında dövlət və özəl iştirakın paralel modelinin formalaşması istiqamətində mühüm addımdır.
Həmçinin, xüsusi icra məmuru məcburi icra orqanı statusuna malikdir, fəaliyyəti peşəkar əsaslarla həyata keçiriləcək.
Bundan başqa, xüsusi icra məmuru dövlət hakimiyyətinin nümayəndəsi hesab edilməyəcək. İcra məmurunun fəaliyyəti sahibkarlıq fəaliyyəti hesab olunmayacaq".
Ayhan
16:53 03.07.2025
Oxunuş sayı: 9293
