Zaxarovanın qeyri- adekvat açıqlamasına reaksiya: Rusiya Azərbaycanla eskalasiya istəyir?
Rusiya XİN-in rəsmi nümayəndəsi Mariya Zaxarova "Sputnik" radiosunun efirində bildirib ki, Moskva və Bakı arasında dostluq münasibətləri son dərəcə əhəmiyyətlidir, onları pozmaq istəyənlər nə etdikləri barədə yaxşı düşünməlidirlər.
"Bu məsələdə sadəcə aranı qatmaq istəyənlər var. Düşünürəm ki, hər iki xalq üçün dostluq münasibətləri son dərəcə vacibdir. Bu münasibətləri pozmaq istəyənlər nə etdikləri barədə yaxşı düşünməlidirlər", - o bildirib.
Son günlər Azərbaycan-Rusiya münasibətlərində müşahidə olunan gərginlik fonunda bəzi rəsmi şəxslərin verdiyi açıqlamalar cəmiyyətdə haqlı narahatlıq doğurub. Xüsusilə Rusiya Xarici İşlər Nazirliyinin bu tip bəyanatları dostluq münasibətləri və qarşılıqlı etimad prinsipləri ilə ziddiyyət təşkil edir. Bu cür çıxışlar təkcə diplomatik münasibətlərə deyil, həm də ölkələr arasında formalaşmış humanitar və ictimai əlaqələrə mənfi təsir göstərmək potensialına malikdir. Məhz bu səbəbdən verilən açıqlamaların mahiyyətinə diqqətlə yanaşmaq və hadisələrin obyektiv qiymətləndirilməsini təmin etmək mühüm əhəmiyyət daşıyır.
Rəsmi Moskvanın qeyri- adekvat bəyanatə barədə Crossmedia.az-a danışan REAL partiyasının sədri Natiq Cəfərli vurğulayıb ki, Rusiya Xarici İşlər Nazirliyinin nümayəndəsinin rusiyalı vətəndaşlara, xüsusilə turistlərə Azərbaycana səfər etməzdən öncə bir neçə dəfə düşünməyi tövsiyə etməsi diqqət çəkir: "Bu, obyektiv və dostyana yanaşma deyil. Əksinə, bu kimi bəyanatlar eskalasiyanı artırmağa yönəlmiş addım kimi qiymətləndirilə bilər. Halbuki, Azərbaycana hər gün yüzlərlə turist səfər edir və bir neçə hava reysi mütəmadi olaraq fəaliyyət göstərir. Şəhər mərkəzində istənilən vaxt rusiyalı turistlərlə qarşılaşmaq mümkündür və onlara qarşı heç bir mənfi münasibət müşahidə olunmur. Azərbaycan cəmiyyətinin davranış normalarında qonağa qarşı xoşagəlməz münasibət göstərmək anlayışı mövcud deyil.
Əgər bəzi şəxslər saxlanılıbsa, bu, onların konkret qanunsuz fəaliyyətlərdə iştirakına dair əsaslı şübhələrə bağlıdır və ümumilikdə rusiyalı turistlərə aid edilə bilməz. Bu baxımdan xanım Zaxarovanın verdiyi açıqlama nə hüquqi, nə də diplomatik baxımdan əsaslı sayıla bilər. Həmçinin, bu cür bəyanatlar dost ölkələr arasında münasibətlərin inkişafına deyil, gərginliyin artmasına səbəb olur.
Bununla belə, ümumi tona diqqət yetirdikdə bəyanatda eskalasiyanın daha da dərinləşməməsinə yönəlmiş müəyyən elementlər də sezilir".
Onun fikrincə, gərginliyin əsas mənbəyi Azərbaycan deyil, məhz Rusiyadır: "AZAL-a məxsus sərnişin təyyarəsinin Rusiya hava məkanında vurulmasından bu günə qədər münasibətləri korlayan addımlar əsasən Rusiya tərəfindən atılıb. Əgər eskalasiya Moskva tərəfindən qaynaqlanırsa, onun aradan qaldırılması üçün də ilk addımlar Rusiya tərəfindən atılmalıdır. Bu, diplomatik kanalların aktivləşdirilməsi, açıqlamaların daha konstruktiv olması, yüksək səviyyəli telefon danışığı və ya görüşlərin təşkili ilə mümkün ola bilər. Qısası, eskalasiyanın qarşısını almaq üçün təşəbbüs də, məsuliyyət də Rusiya tərəfində olmalıdır".
Ləman Həsənova
13:01 03.07.2025
Oxunuş sayı: 9376
