"Rusiyanın konsulluq adı altında Azərbaycanda kəşfiyyatçı yerləşdirdiyini istisna etmirəm" - ŞOK
Müasir dünyada informasiya silaha çevrilib. Artıq dövlətlər yalnız tank və toplarla deyil, media vasitəsilə də ideoloji müharibələr aparır, xarici ölkələrin informasiya suverenliyinə müdaxilə edirlər. Bu kontekstdə Rusiya Federasiyası öz "yumşaq güc" siyasətinin bir parçası olaraq, uzun illərdir ki, media qurumlarını — xüsusilə də "Sputnik" kimi agentlikləri — sadəcə informasiya yayım vasitəsi deyil, həm də kəşfiyyat və təsir aləti kimi istifadə edir. Azərbaycan hüquq-mühafizə orqanlarının "Sputnik Azərbaycan" ofisində keçirdiyi son əməliyyat və bu qurumun iki əməkdaşının casusluq ittihamı ilə həbs olunması, təkcə cinayət faktı deyil, həm də Rusiyanın regionda həyata keçirdiyi sistemli informasiya müdaxiləsinin ifşasıdır. Bu hadisə bir daha göstərdi ki, Moskva "dost media" pərdəsi altında suveren ölkələrin daxili işlərinə müdaxilə etməkdən çəkinmir.
Mövzu ilə bağlı siyasi şərhçi Aydın Quliyev Crossmedia.az-a açıqlama verib:
"Sputnik Azərbaycan" da yoxlamalar Azərbaycanın suveren hüquqları çərçivəsində aparılan tədbirlərdir. Ümumiyyətlə, hər hansı bir ölkənin media pərdəsi altında fəaliyyət göstərən orqanlarının əgər belə işləri ortaya çıxarsa, onlarla bağlı da bu cür addımlar atılacaq. Məsələ bundadır ki, Sputnik Azərbaycan Rusiyanın media orqanı olaraq aylar öncə fəaliyyəti Azərbaycanda məhdudlaşdırılmışdı. Ancaq görünür ki, göstərilən iradlardan nəticə çıxarılmadı və media orqanının fəaliyyətini qanuni çərçivəyə salmaq üçün lazımi addımlar atılmalıdır. Üstəlik, bu media orqanı çətiri altında Rusiya xüsusi xidmət orqanlarının əməkdaşları da Azərbaycanda yerləşdirildi. Bu, əslində medianın imkanlarından sui-istifadə etmək cəhdləridir. Bəzi ölkələr diplomatlardan kəşfiyyat üçün istifadə edir. Bu gün biz Rusiyanın təkcə diplomatlardan yox, eyni zamanda jurnalistlərdən və mediadan kəşfiyyat işində istifadə etdiyini görürük. Bu nöqteyi-nəzərdən, əlbəttə, media orqanlarının adı altında kəşfiyyat işi ilə məşğul olan bütün ölkələrin, o cümlədən Rusiyanın Azərbaycanda mövcud olan xüsusi xidmət orqanları əməkdaşları ifşa edilməlidir. Xüsusən də Rusiyanın Azərbaycandakı diplomatik korpusunda da, istisna etmirəm ki, kəşfiyyat işi ilə məşğul olanlar var. Rusiyanın Azərbaycandakı səfirliyinin müxtəlif konsulluq çətiri altında Azərbaycanda kəşfiyyatçıları yerləşdirdiyini də istisna etmirəm".
Ayhan
19:27 02.07.2025
Oxunuş sayı: 7908
