Zelenskidən Azərbaycan liderinə mühüm zəng: "Arxivlər də sübut edir ki..." -DEPUATAT
İyulun 1-də Ukrayna Prezidenti Volodimir Zelenski Azərbaycan Respublikasının Prezidenti İlham Əliyevə zəng edib. Zelenski Rusiyanın Yekaterinburq şəhərində azərbaycanlılara qarşı hücumlarda həmvətənlilərimizin qətlə yetirilməsi ilə bağlı Ukrayna ictimaiyyətinin başsağlığını çatdırıb.
Dövlət başçısı başsağlığına görə minnətdarlığını bildirib.
Prezident Volodimir Zelenski, həmçinin Ukrayna vətəndaşlarının İrandan təxliyəsi məsələsində Azərbaycanın dəstəyinə görə dövlət başçısına təşəkkür edib.
Telefon söhbəti əsnasında ölkələr arasında ikitərəfli münasibətlərin perspektivlərinə dair fikir mübadiləsi aparılıb, Hökumətlərarası Komissiyanın iclasının tezliklə Bakıda keçirilməsi ilə bağlı razılıq əldə olunub. Azərbaycanın və Ukraynanın ərazi bütövlüyünə və suverenliyinə bir daha qarşılıqlı dəstək ifadə edilib.
Ukrayna Prezidenti, eyni zamanda, Azərbaycanın ölkəsinə göstərdiyi humanitar yardımlara görə də minnətdarlığını bildirib.
Liderlərin telefon danışığı ikitərəfli münasibətlərin mövcud durumunu yenidən aktual edir.
Bu barədə Crossmedia.az-a danışan Milli Məclisin deputatı Hikmət Babaoğlu söyləyib ki, bu gün Ukrayna dövlətçilik tarixində çox çətin bir mərhələdən keçir: "Azərbaycanın da torpaqlarları vaxtilə işğal olunub. Ona görə də Azərbaycan öz prinsipial mövqeyinə sadiq qalır. Rəsmi Bakı nəticə etibarilə beynəlxalq hüquqa uyğun olaraq dövlətlərin ərazi bütövlüyünə və suverenliyinə daim hörmətlə yanaşıb. Bugün də bu mövqeyini açıq şəkildə ifadə edir. Düşünürəm ki, bu, dəyişməz mövqedir. Nə qədər ki, beynəlxalq hüquq var, nə qədər ki, dövlətlərin ərazi bütövlüyü prinsipi mövcuddur, bu prinsiplər də beynəlxalq münasibətlərin əsas dayaqları kimi qəbul edilməlidir".
Parlamentari qeyd edib ki, çətin dövrdə Azərbaycanın Ukraynaya humanitar yardım göstərməsi, bu iki xalq arasında tarixi və mənəvi bağların göstəricisidir: "Azərbaycanın və Ukraynanın çox dərin tarixi əlaqələri var. Hər iki respublika eyni siyasi keçmişi paylaşıb və oxşar tarixi faciələri yaşayıblar. Bu səbəbdən də münasibətlərin yüksək səviyyədə olması labüddür və Azərbaycan bu məsələyə daim diqqət yetirir. Ukrayna Azərbaycan xalqının əcdadları hesab olunan və etnogenezimizdə mühüm rol oynamış polovetslərin, qıpçaqların tarixi vətənidir. Qıpçaqlar, kumanlar, polovetslər kimi digər türk tayfaları Ukrayna xalqının formalaşmasında da iştirak ediblər. Bu baxımdan tarixin dərinliklərindən gələn bu münasibətlər, Ukrayna–Azərbaycan əlaqələrində mənəvi yaxınlıq yaradır.Ukrayna arxivləri də sübut edir ki, Azərbaycandan Azov dənizi hövzəsinə köç etmiş qıpçaqların dini və mədəniyyətləri bu ərazidə iz buraxıb. Azov dənizinin adı da “Azvaq dənizi” kimi çəkilir ki, bu da bizim etnik köklərimizlə bağlılıq göstərir".
Müsahibimizin sözlərinə görə, ilkin orta əsrlərdə Azərbaycanda danışılan xristian-qıpçaq ləhcəli dil, 17-ci əsrin ortalarına, 18-ci əsrin əvvəllərinə qədər Ukraynada xalq dili kimi istifadə olunub: "Bu tarixi faktlar da bir daha sübut edir ki, Ukrayna–Azərbaycan münasibətlərinin bugünkü səviyyəsi təkcə siyasi maraqlara deyil, həm də dərin tarixi və etnik bağlara əsaslanır. Azərbaycan dövləti də bu tarixi, etnik və siyasi keçmişi nəzərə alaraq, beynəlxalq hüquqa əsaslanaraq Ukraynaya yardım edir və onun ərazi bütövlüyünü dəstəkləyir".
Mehriban Yariyeva
14:48 02.07.2025
Oxunuş sayı: 18433
