Baş Prokurorluq: Qəsdən adamöldürmə, işgəncə və qeyri-insani rəftar beynəlxalq hüquqa ziddir
Qəsdən adamöldürmə, işgəncə və qeyri-insani rəftar beynəlxalq müqavilələrin tələblərinin ciddi şəkildə pozulmasına səbəb olur. Həm Azərbaycan, həm də Rusiya bir sıra beynəlxalq konvensiya və müqavilələrin iştirakçısıdır.
Crossmedia.az bildirir ki, bu barədə Baş Prokurorluğun Beynəlxalq Hüquqi Əməkdaşlıq İdarəsinin rəis müavini Samirə Nəcəfzadə Azərbaycan vətəndaşlarının və azərbaycanəsilli şəxslərin Rusiyanın Yekaterinburq şəhərində işgəncəyə məruz qalmaları və xüsusi amansızlıqla qəsdən öldürülmələri ilə bağlı keçirilən brifinqdə məlumat verib.
S. Nəcəfzadənin sözlərinə görə, sözügedən hallar Birləşmiş Millətlər Təşkilatının İşgəncələrə qarşı Konvensiyasının, “Mülki və siyasi hüquqlar haqqında beynəlxalq pakt”ın və Avropa İnsan Hüquqları Konvensiyasının müddəalarının pozulması ilə nəticələnib. O qeyd edib ki, Azərbaycan bu konvensiyaların üzvü olaraq qalır, Rusiya isə 2022-ci ilə qədər Avropa İnsan Hüquqları Konvensiyasına qoşulmuşdu. Həmin sənədlərin tələblərinə əsasən, Rusiyada yaşayan Azərbaycan vətəndaşlarının və azərbaycanəsilli şəxslərin hüquqları ciddi şəkildə pozulub.
12:36 02.07.2025
Oxunuş sayı: 7126
