Rusiyanın "Məlikməmməd nağılı"na inanan olmadı: "Kreml həddini aşıb"
Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin baş direktoru, professor Ədalət Həsənov bu gün keçirilən mətbuat konfransında bildirib ki, Rusiyanın Yekaterinburq şəhərində hüquq-mühafizə orqanlarının öldürdüyü azərbaycanlı qardaşlar - Ziyəddin və Hüseyn Səfərovların meyitləri xüsusi ekspertiza ilə müayinə olunub.
Onun sözlərinə görə, gecə yarısı meyitlərin müayinəsi başa çatıb:
"Biz meyitləri müayinə etməmişdən əvvəl ölüm haqqında tibbi şahadətnamələrinə baxmışıq. Hüseyn Səfərovun meyitinin müayinəsi zamanı küt alətlə qətlə yetirildiyi məlum olub. Biz meyiti müayinə edərkən çoxlu sayda travma müəyyən etmişik. Burun sümüklərinin sınığı, döş qəfəsi deformasiyaya uğrayıb, gözətrafı nahiyədə 14-12 sm sahədə qançır var. Üst və alt dodağın selikli qişasında qançırlar, alnın sağ və sol nahiyələrində qançır, döş qəfəsinin arxa səthində iki ədəd qançır, əllərdə qançır, sol ayağında və xayalarda qançır müəyyən olundu. Hər iki budda çoxsaylı qançır, sol budun iç səthinin zolaq şəkilli sıyrığı, sol baldırın arxa iç səthinin sıyrığı, sol budun 17 sm ölçüdə sıyrığı müəyyənləşib".
Ə.Həsənov həmçinin meyitdə daxili müayinənin həyata keçirildiyini də bildirib:
"Biz şübhələnirdik ki, zədələnmiş yerlər kəsilib götürüləcək. Meyitin daxili müayinəsi zamanı başında küt alətlə zərbə, baş beynin sərt və yumşaq qişasında qansızmalar, döş qəfəsində 7-8 qabırğanın yer dəyişən sınıqları müəyyən edildi. Biz qaraciyərin kəsilmiş, cırılmış yerlərini tapdıq. Qabırğaarası əzələlərdə də qansızmalar müəyyən olundu. Diafraqmada da geniş qansızmalar var idi. Qarın boşluğunda peritonun partlaması nəticəsində qansızma müəyyın edildi".
Bu deyilənlər Rusiyanın soydaşlarımızın ölümləri ilə bağlı danışdığı "Məlikməmməd nağılını" ifşa edir. Qarşı tərəf bütün imkanları ilə soydaşlarımızın həyəcandan ürəklərinin partladıqlarını və onlara qarşı zorakılığın olmadığını iddia edirdilər. Amma çox qısa müddətdə aydın oldu ki, rəsmi Moskva sadəcə özünü aldada bilər. Necə deyərlər, kor- kor, gör-gör...
İctimai- siyasi xadim, həkim Zəlimxan Məmmədli bu barədə Crossmedia.az-a açıqlamasında qeyd edib ki, Azərbaycanın dövlətçilik və prinsipial mövqeyi Rusiyadakı siyasi dairələri narahat edir: "Rusiyadakı beynəlxalq hüquq yox, zor-zopa işləyir. Baş verənlər imperiya siyasətinin təzahürüdür. Son hadisələr Rusiyanın həddini aşmasıdır. Görünür, rəsmi Bakının müstəqil xarici siyasət kursu, həmçinin Azərbaycan- Türkiyə- Ermənistan üçbucağında baş verənlər Rusiyanı narahat edir. Ermənistandakı revanşistlərin zəifləməsi də Kremlin ürəyincə deyil. Bütün bunların fonunda rəsmi Moskva qıcıqlanır. Rusiya Azərbaycana öz for-posti kimi yanaşmaq istəyir. Lakin başa düşməlidir ki, Azərbaycan müstəqil ölkədir".
Müsahibimiz həmçinin məsələnin tibbi tərəfi barədə danışıb: "Hadisənin konkret səbəbləri artıq bəlli olub. Ümumiyyətlə, bir ailənin bütün üzvlərinin eyni anda ürəktutmadan ölməsi ağlabatan deyil. Onların uzunmüddət döyülməsi, həyati vacib orqanların zədələnməsi artıq təsdiqlənib. Bu barədə rəy ortaya qoyulmalı və ictimailəşdirilməlidir".
Kənan Novruzov
12:21 01.07.2025
Oxunuş sayı: 4672
