"Rusiya-Azərbaycan münasibətlərində daha dərin zədələr yarana bilər"- Deputat
Rusiyada son vaxtlar baş verənlər, bu ölkədə miqrantlara, xüsusilə də azərbaycanlılara qarşı aparılan siyasətin təhlükəli bir mərhələyə keçdiyini göstərir. Etnik ayrı-seçkilik, məcburi səfərbərlik və zorakı təzyiqlər artıq sistemli xarakter alıb. Bu proseslər Kremlin iç üzünü – güc itirdikcə daha da sərtləşən və günahı digərlərində axtaran bir rejimin mahiyyətini ortaya qoyur.
Mövzu ilə bağlı Milli Məclisin deputatı Aydın Hüseynov Crossmedia.az-a açıqlama verib:
“Rusiyada baş verən hadisələri bir cümlə ilə ifadə etsək, bunu şovonizmin, ayrıseçkiliyin, milli və dini ayrıseçkiliyin və nəhayətdə miqrantlara qarşı aparılan dəhşətli siyasətin təzahürləri və birbaşa insan haqlarına hayqırıdır. Şimal qonşumuzun Ukraynaya qarşı apardığı müharibədə təkcə rus millətindən olan vətəndaşların yox, eyni zamanda başqa millətlərdən olanların da bu əməliyyatlarda iştirak etdiyi görüntüsü yaratmaq üçün Rusiya ərazisində yaşayan miqrantların səfərbərliyə cəlb edilməsi, həm də bunu müxtəlif təzyiqlərlə həyata keçirilməsi qanunsuzluqdur. İlkin məlumatlardan biri də budur ki, Yekaterinburqda yaşayan azərbaycanlılara qarşı Rusiya xüsusi təyinatlılarının zorakılıqla, insan ölümü ilə müşayiət olunan basqının səbəblərindən biri də onların müharibəyə cəlb olunmasıdır. Bu bir daha onu göstərir ki, Rusiyada Azərbaycana və azərbaycanlılara qarşı Kreml təbliğatçılarının qızışdırdığı nifrət özünün kulminasiya nöqtəsinə çatıb”.
Deputat həmçinin bildirib ki, Rusiya Ukrayna ilə ədalətsiz savaşda milyardlar itirir: “Maddi itkilər bir tərəfdən, insan itkisi də digər tərəfdən Rusiya rəhbərliyini çaşqın vəziyyətə salıb. Bu itkiləri aradan qaldırmaq üçün Rusiya Mərkəzi Asiya, Qafqaz və başqa postsovet ölkələrindən olan qeyri-rus vətəndaşlara, eyni zamanda mühacirləri səfərbərliyə cəlb edirlər. Kimsə döyüşməkdən imtina edərsə onu Rusiya vətəndaşlığından məhrum edir və ölkədən çıxarırlar. Mühacirlərə isə müharibəyə gedəcəkləri halda vətəndaşlıq verir, imtina etdikdə isə onlar deportasiya olunurlar. Bunu Rusiyanın İstintaq Komitəsinin rəhbəri Aleksandr Bastrıkin dediyi fikirlər də sübut edir. O, Peterburqda beynəlxalq hüquq forumunda çıxış edərkən bildirib ki, hüquq-mühafizə orqanları Ukrayna ilə müharibəyə Rusiya pasportu almış 20 min miqrantı tutub aparıblar. Yekaterinburq hadisələri də bu kampaniyanın tərkib hissəsidir. Rusiya hakimiyyət orqanlarının azərbaycanlılara qarşı aparılan sərt siyasətin bir səbəbini də ötən il dekabrın 25-də AZAL-ın Bakı–Qroznı reysini yerinə yetirən “Embraer 190” tipli sərnişin təyyarəsinin vurulmasında axtarmaq lazımdır. Qazaxıstanın Aktau şəhəri yaxınlığında qəzaya uğrayan təyyarədə olan 67 nəfərdən 38-i həlak olub. Azərbaycan hüquq-mühafizə orqanları bu müddət ərzində Rusiya tərəfi ilə mütəmadi əlaqə saxlayıb. Hər ay məsələ ilə bağlı sorğular göndərilir. Qarşı tərəfin Azərbaycana verdiyi izahat ondan ibarətdir ki, hazırda Rusiyada istintaq tədbirləri davam edir. Rusiyanın bu məsələdə hərəkətsizliyi heç cür qəbul oluna bilməz. Əlbəttə, Azərbaycan bu cinayəti beynəlxalq müstəvidə inkişaf etdirəcək və məsələnin ədalətli həllinə, günahkarların cəzalandırılmasına, müvafiq kompsesasiyaların ödənilməsinə nail olacaq. Ədalətli mövqe sərgiləmək, baş verən hadisələrdə günahkarların cəzalandırılmasında maraqlı olmaq əvəzinə anti-Azərbaycan prosesini gücləndirmək heç cür anlaşılan, qəbul edilən məsələ deyil. Bütün bunlar Rusiya-Azərbaycan münasibətlərində daha dərin zədələrin yaranmasına rəvac verir”.
Ayhan
22:18 29.06.2025
Oxunuş sayı: 9269
