Rusiyada azərbaycanlılara qarşı kütləvi təqiblər: "İkitərəfli münasibətlərə zərbə vura bilər"
İyunun 27-si gecə saatlarında Rusiyanın Yekaterenburq şəhərində Rusiya hüquq mühafizə orqanları tərəfindən onlarla azərbaycanlı saxlanılıb, ikisi isə öldürülüb. Qeyd edilir ki, təqiblər 2001-ci ildə Azərbaycan diasporunun adı hallanan qətldə kimin əli olduğu ilə bağlı başlayıb. Gecəyarısı soydaşlarımıza yönəlmiş bu amansız əməliyyata qarşı Azərbaycan XİN öz mövqeyini bildirdi. Bəs bu hadisə Azərbaycan Rusiya münasibətlərinə necə təsir edəcək? Rusiya bundan sonra hansı addımı atmalıdır?
Mövzu ilə bağlı Beynəlxalq Münasibətlərin Təhlili Mərkəzinin mütəxəssisi, politoloq Mətin Məmmədli Crossmedia.az-a açıqlama verib:
“Rusiya tərəfindən belə məlumat yayılıb ki, hansısa cinayət işi ilə bağlı Rusiya hüquq mühafizə orqanları axtarışlar aparıb və müəyyən həbslər həyata keçirib. Bu axtarışların aparılması və həbslərin həyata keçirilməsi ilk növbədə qanunvericiliyə uyğun olmalıdır. Rusiya hüquq mühafizə orqanlarının bizim soydaşlarımıza münasibətdə nümayiş etdirdiyi davranış narahatlıq doğurur. Təsadüfi deyil ki, artıq Azərbaycan XİN-də bununla bağlı öz mövqeyini açıq şəkildə ifadə edib. Düşünürəm ki, qısa müddət ərzində Rusiya məsələ ilə bağlı bizim narahatlığımızı aradan qaldıran mövqe nümayiş etdirməlidir. Əks halda baş verən bu hadisələr iki ölkə arasındakı münasibətlərə çox neqativ təsir göstərəcək”.
Ayhan
15:00 28.06.2025
Oxunuş sayı: 20349
