Rusiyada yaxınları öldürülən Seyfəddin Hüseynli: Yaxınlarımız, qadınlı, uşaqlı, qocalı təzyiq və qorxu altındadır
Rusiyanın Federal Təhlükəsizlik Xidmətinin Yekaterinburq şəhərində azərbaycanlıların yaşadığı evlərə basqın zamanı yaxınları öldürülən “525-ci qəzet”in baş redaktor müavini Seyfəddin Hüseynli deyib ki, Rusiyada yaşayan yaxınları hazırda təzyiq altındadır.
Crossmedia.az xəbər verir ki, o , bu sözləri “Report”a açıqlamasında bildirib.
Seyfəddin Hüseynli deyib ki, hadisədən sonra dövlətin dəstəyini və diqqətini hiss edir:
“Təəssüf ki, bu müsibət başımıza gəldi. Bu vəziyyətdə Allaha və dövlətimizə güvənirəm. Azərbaycanın Prezident Adminstrasiyasından, Diaspor Komitəsindən mənimlə əlaqə saxlayıblar. Rusiyada yaşayan digər yaxınlarımz artıq Azərbaycan dövlətinin dəstəyini hiss etməyə başlayıblar. Rusiya tərəfi dövlətimizin dəstəyindən sonra qanunazidd addımlarından çəkinməyə başlayıb. Azərbaycanın Rusiyadakı səfirliyi, konsulluq, Diaspora Komitəsi məsələni nəzarətdə saxlayır”.
Seyfəddin Hüseynlinin sözlərinə görə, onun digər qohumu Kamal Qədiməli oğlu Səfərov da işgəncə altında öldürülüb:
“Hələ də aqibətindən xəbər olmayan yaxınlarımız var. Bu qətlə yetirilən üçüncü yaxınımızdır. Ölənlərin cənazələrinin təhvil verilməsi üçün danışıqlar gedir. Rusiya tərəfi meyitlərin təhvil verilməsi məsələsində lazımsız bəhanələr gətirir. Onlar bunu köhnə kriminal hadisənin hesablaşması kimi göstərməyə çalışırlar. Yaxınlarımızın ürək tutmasından öldüyü barədə yalan məlumatlar yayırlar. Qarşı tərəf özünü bu məsələdə qeyri-obyektiv aparır. Qohumlarımız qadınlı, uşaqlı, qocalı hamısı təzyiq və qorxu altındadır”.
13:54 28.06.2025
Oxunuş sayı: 10238
