Kərim Vəliyev Türkiyəyə getdi: “İkitərəfli əməkdaşlıq genişlənir”- Ekspert
Müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev Türkiyəyə səfərə gedib. Onun rəhbərlik etdiyi nümayəndə heyəti Türkiyə Silahlı Qüvvələrinin Baş Qərargah rəisi ordu generalı Metin Gürakın dəvəti ilə İstanbul şəhərinə yola düşüb.
Səfər proqramına əsasən, Azərbaycan nümayəndə heyətinin əvvəlcə İstanbul şəhərində “Sülhün Müdafiəçisi - 2025” beynəlxalq təlimini izləməsi, sonra isə Konya şəhərində “Anadolu Qartalı - 2025” beynəlxalq təliminin Yüksək Səviyyəli Müşahidəçi Günündə iştirakı planlaşdırılıb.
Qeyd edək ki, səfər çərçivəsində general-polkovnik K.Vəliyevin Türkiyə Respublikasının milli müdafiə naziri cənab Yaşar Güler ilə görüşü də nəzərdə tutulub.
Bu səfərlə və Azərbaycanla Türkiyə arasındakı hərbi əməkdaşlıq barədə Crossmedia.az-a danışan hərbi ekspert Üzeyir Cəfərov bildirib ki, Azərbaycan Müdafiə nazirinin birinci müavini, Baş Qərargah rəisi, general-polkovnik Kərim Vəliyevin Türkiyəyə səfəri mühüm tədbirlərlə bağlı həyata keçirilir: “Bu səfərin əsas məqsədi Azərbaycan ilə Türkiyə arasında hərbi əməkdaşlığın genişləndirilməsi və birgə təlimlərin əlaqələndirilməsidir. İyun ayının 23-dən iyulun 4-dək Türkiyənin Konya vilayətində keçirilən “Anadolu Qartalı 2025” beynəlxalq təlimləri məhz bu səfərin əsas istiqamətlərindən biridir. General-polkovnik Kərim Vəliyev həmin təlimlərin yüksək səviyyəli müşahidəçi qrupunda iştirak edəcək və bununla yanaşı, bir sıra rəsmi görüşlər də keçirəcək”.
Ekspert bildirib ki, bu görüşlərin əhəmiyyəti xüsusilə böyükdür: ”Çünki Azərbaycan və Türkiyə hərbi əməkdaşlığı təkcə təlimlərlə məhdudlaşmır, həm də birgə planların hazırlanmasını və icrasını əhatə edir. Məhz bu baxımdan, səfər çərçivəsində Türkiyə Silahlı Qüvvələrinin Baş Qərargah Rəisi, ordu generalı Metin Gürak və Türkiyə Milli Müdafiə Naziri Yaşar Gülerlə müzakirələrin aparılması planlaşdırılıb. Bu müzakirələrin əsas mövzusu qarşıdakı aylarda keçiriləcək birgə təlimlərin koordinasiyasıdır. General-polkovnik Kərim Vəliyev Ordunun Baş Qərargah rəisi kimi bu məsələlərə bilavasitə cavabdehlik daşıyan şəxsdir və ona görə də bu məsələləri yerindəcə müzakirə edir”.
Müsahibimiz əlavə edib ki, bölgədəki geosiyasi vəziyyət fonunda keçirilən bu təlimlər, həm nəzəri, həm də praktiki cəhətdən əlavə elementlərin işlənib hazırlanması baxımından xüsusi əhəmiyyət daşıyır: “Bu baxımdan, Azərbaycan–Türkiyə hərbi əməkdaşlığı regionun təhlükəsizliyi və sabitliyi üçün mühüm rol oynayır. Azərbaycan və Türkiyə arasında əməkdaşlıq çərçivəsində keçirilən qarşılıqlı səfərlər bu münasibətlərin ayrılmaz tərkib hissəsidir. Türkiyə Müdafiə Nazirliyinin nümayəndələrinin Azərbaycana, eyni zamanda Azərbaycan hərbçilərinin Ankaraya, İstanbula, Konyaya və digər şəhərlərə səfərləri qarşılıqlı razılıq əsasında reallaşır və iki ölkə arasında sarsılmaz hərbi tərəfdaşlığın göstəricisidir. Azərbaycan tərəfindən bu əməkdaşlıq yüksək səviyyədə koordinasiya olunur. Bu həm Azərbaycan Ordusunun döyüş hazırlığının artırılması, həm də hərbi təhsil, tibb və digər sahələrdə əməkdaşlığın dərinləşdirilməsi məqsədini daşıyır. Bu kontekstdə Azərbaycan–Türkiyə əməkdaşlığı günü-gündən genişlənir, keçirilən birgə təlimlərin sayı artır”.
Fidan Qarayeva
18:31 26.06.2025
Oxunuş sayı: 15909
