"Beynəlxalq enerji investorları üçün Azərbaycan sabit məkan kimi cəlbedicidir" -DEPUTAT
Azərbaycan enerji sahəsində yeni mərhələyə qədəm qoyur. Prezident İlham Əliyevin iyunun 24-də Mingəçevirdə “8 Noyabr” İstilik Elektrik Stansiyasının açılışında səsləndirdiyi fikirlər ölkənin həm daxili enerji təhlükəsizliyi, həm də beynəlxalq enerji bazarındakı rolunu gücləndirmək niyyətini bir daha nümayiş etdirdi. Qaz yanacağının qənaəti, səmərəlilik və 2030-cu ilə qədər 6,500 MVt-lıq bərpa olunan enerji hədəfi Azərbaycanın dayanıqlı enerji gələcəyinə verdiyi əhəmiyyətin bariz nümunəsidir.
Bu barədə Crossmedia.az-a danışan Milli Məclisin deputatı Nigar Məmmədova bildirib ki, Beynəlxalq enerji investorları üçün Azərbaycan sabit məkan kimi cəlbedicidir: "Mingəçevirdə yeni istifadəyə verilən “8 Noyabr” Elektrik Stansiyası bütövlükdə ölkəmizin enerji potensialını gücləndirəcək. Açılış mərasimində dövlət başçımız da bəyan etdi ki, bu stansiya həm də enerji sisteminin səmərəliliyini artıracaq. Ümumiyyətlə, dünyada baş verən kataklizmlər fonunda enerjiyə tələbatın artması, daxili enerji infrastrukturunun və texnologiyalarının inkişafına investisiya yatırmağın vacibliyini göstərir. Çünki bu, ilk növbədə ölkənin xarici təhlükələrə qarşı dayanıqlığını artırır”.
N.Məmmədovanın sözlərinə görə, düzgün enerji siyasəti enerji sahəsində innovasiyaları və yeni texnologiyaların inkişafını stimullaşdırmaqla imkanları genişləndirir: "Yeni stansiyanın da əsas üstünlüklərindən biri təbii qaza qənaətə imkan yaratmaq, həmçinin karbon qazı emissiyalarında azalmanı təmin etməsidir. Bu, Azərbaycanın milli iqlim hədəflərinə, eləcə də aşağıkarbonlu gələcək qurmaq istiqamətindəki genişmiqyaslı məqsədlərinə də töhfə verir. Beləliklə, Azərbaycan həm də COP29-un ev sahibi kimi ekoloji təmiz, daha etibarlı və daha səmərəli texnologiyalar tətbiq etmək istiqamətində dinamik və uzaqgörən yanaşma sərgiləmiş olur. Bu gün Azərbaycan qazı hesabına öz enerji təhlükəsizliyini təmin edən ölkələrin coğrafiyası genişlənir. Azərbaycanın uğurlu enerji siyasəti hesabına ölkəmiz Pan-Avropa qaz təchizatçısı hesab olunur və bizimlə əməkdaşlıq etmək istəyən tərəfdaşların sayı artır”.
Parlamentarinin sözlərinə görə, dünyada enerji xətlərinə təhdidlərin yarandığı bir vaxtda Azərbaycanın timsalında bölgədə sabitlik, inkişaf, tərəqqi məkanına ehtiyac var: "Təsadüfi deyil ki, yeni Elektrik Stansiyasının inşasında yaxından iştirak edən İtaliya və Çin şirkətləri də Azərbaycandakı təhlükəsiz və sabit mühiti nümunə kimi qiymətləndirirlər. Məsələ burasındadır ki, bütün investorlar daha sabit məkanlara yatırım etməkdə maraqlıdır. Azərbaycan həm də bu mənada beynəlxalq investorlar üçün əhəmiyyətli tərəfdaşdır. 30 ilə yaxın işğaldan əziyyət çəkən Azərbaycan sabitliyi öz gücü hesabına təmin edib və təsadüfi deyil ki, regionun ən böyük energetika mərkəzi sayılan Mingəçevir şəhəri də 44 günlük Vətən müharibəsi dövründə düşmənin hədəfində idi. Cənab Prezident bir daha bəyan etdi ki, məqsəd bizim enerji infrastrukturumuzu iflic vəziyyətinə salmaq idi. Təbii ki, bu məkrli plan baş tutmadı. Bu mənada yeni Elektrik Stansiyasının adının “8 Noyabr” olmasında da rəmzilik var. Beynəlxalq investorlar da bu nəhəng stansiyanı Azərbaycanın enerji təhlükəsizliyinə, davamlı inkişafa və sənaye tərəqqisinə töhfəsinin rəmzi kimi qiymətləndirirlər".
Fidan Qarayeva
12:30 26.06.2025
Oxunuş sayı: 13077
