"Millətimizin bağrından çıxan Silahlı Qüvvələrimiz qürur yerimiz, göz bəbəyimizdir"- Deputat
26 iyun – Silahlı Qüvvələr Günü müasir, müstəqil Azərbaycanın gücünü, dövlətçilik iradəsini və ərazi bütövlüyünün keşiyində dayanan ordu quruculuğunun yüksək mərhələyə çatmasını simvolizə edən mühüm tarixdir. Son illər Azərbaycan ordusu və xalqı bu tarixi xüsusi fərəhlə qeyd edir. Çünki İkinci Qarabağ savaşı və birgünlük antiterror tədbirləri nəticəsində torpaqlarını işğaldan azad edən Azərbaycan Silahlı Qüvvələri regionda tamamilə yeni reallıq yaradıb. Azərbayczn ordusu dünya reytinqində ilbəil irəliləyir. Azərbaycan Silahlı Qüvvələri ən müasir standartlara cavab verir.
Milli Məclisin sədr müavini Musa Qasımlı Silahlı Qüvvələr Günü münasibətilə Crossmedia.az-a açıqlama verib:
"Artıq bir neçə ildir ki, Silahlı Qüvvələr Gününü qalib millət və dövlət olaraq böyük qürur hissi ilə bayram edirik. Ölkəmizdə ordu quruculuğunun bəlli bir tarixi vard. Müxtəlif zamanlarda qurulan dövlətlərimizin orduları haqqında məlumatlar vardır. Çarizm dövründə azərbaycanlılar hərbi xidmətə çağırılmırdı. Onlar buna görə həm vergi ödəyir, həm də silah işlətməyi, özlərini müdafiə etməyi yadırğayırdı. 1918-ci il iyunun 26-da Cümhuriyyət hökuməti milli ordunun yaradılmasına başladı. Qısa müddətdə uğurlar əldə edildi. 1920-ci ilin aprelində bolşevik işğalı nəticəsində Cümhuriyyətin süqutundan sonra Azərbaycan hərbçilərinin böyük bir hissəsi Gəncəyə getdi. Burada may ayında baş verən üsyanın aparıcı qüvvəsi oldular. Üsyan yatırıldıqdan sonra onların çoxu güllələndi, bir hissəsi isə sürgünə göndərildi. Azərbaycan diviziyasının yüksək rütbəli zabitləri 1920-ci illərin sonlarında repressiyalara məruz qaldılar. Diviziya sovet rəhbərliyi tərəfindən dağıdıldı".
Musa Qasımlı həmçinin qeyd edib:
"Sovet dövründə Azərbaycanın Müdafiə Nazirliyi mövcud deyildi. Müdafiə, təhlükəsizlik və xarici siyasət sahələri birbaşa Mərkəzin nəzarətində idi. Çarizmdən fərqli olaraq sovet rəhbərliyi azərbaycanlıları hərbi xidmətə çağırsa da, onları əsasən tikinti batalyonlarında xidmət etdirirdi. Hərbi xidmətə çağırılan azərbaycanlıların yalnız 15 faizi döyüş hərbi hissələrində xidmət keçirdi. Bu ədalətsiz vəziyyəti ilk dəfə olaraq Ulu Öndər Heydər Əliyev dəyişdi. Onun təşəbbüsü və ciddi səyləri nəticəsində 1971-ci ildə Cəmşid Naxçıvanski adına Hərbi Məktəb açıldı. Məktəbin açılmasına çoxlu maneələr törədilirdi. Mərkəzdə deyirdilər ki, ölkənin müdafiəsi vahiddir, böyük şəhərlərdə artıq hərbi məktəblər vardır, sizin kadrlarınız yoxdur və belə bir məktəb sizə lazım deyildir. Lakin Ulu Öndər Heydər Əliyev yolundan dönmədi. Məktəbin yaradılmasının 10 illiyi münasibətilə keçirilən toplantıdakı nitqində deyirdi ki, o zaman bizə söyləyirdilər, bu məktəb lazım deyildir, amma zaman bizim nə qədər düzgün bir iş gördüyümüzü göstərdi".
Musa Qasımlı müstəqillik dövründən sonrakı dövrdə ordu quruculuğundan danışıb:
"Dövlət müstəqilliyi bərpa edildikdən sonra ordu quruculuğuna başlanılsa da, bu proses uğurlu olmadı. Ərazilərimiz işğal edilirdi. 1993-cü ildə ikinci dəfə hakimiyyətə gələn Ulu Öndər Heydər Əliyev nizami ordu yaratdı. Qısa müddət ərzində Azərbaycan Ordusu uğurlu Horadiz əməliyyatını keçirərək torpaqlarımızın bir hissəsini işğaldan azad etdi. Ulu Öndərin 1998-ci il mayın 22-də imzaladığı sərəncama əsasən, ölkəmizdə 26 İyun – Silahlı Qüvvələr Günü elan edildi. 2003-cü ildə hakimiyyətə gələn cənab Prezident İlham Əliyev ərazilərimizi düşmən işğalından qurtarmaq məqsədilə ordu quruculuğuna xüsusi diqqət yetirdi. Ordumuz dünyanın qabaqcıl orduları cərgəsində yer tutdu. 2020-ci il sentyabrın 27-də başlayan 44 günlük Vətən müharibəsində və 2023-cü il sentyabrın 19-20-də həyata keçirilən lokal xarakterli antiterror tədbirləri nəticəsində işğalçı Ermənistan Müzəffər Ali Baş Komandan, cənab Prezident İlham Əliyevin qarşısında diz çökdü, çəkmələrinin altına yıxıldı, məğlub oldu. Ərazi bütövlüyümüz və dövlət suverenliyimiz tam bərqərar edildi. Ölkəmizdə separatizmin kökü birdəfəlik kəsildi. Bu gün dövlət bayrağımız hər yerdə qürurla dalğalanır. Millətimizin bağrından çıxan Silahlı Qüvvələrimiz qürur yerimiz, göz bəbəyimizdir".
Fatimə Nəbiyeva
14:50 25.06.2025
Oxunuş sayı: 7334
