"Rəsmi İrəvanın destruktiv mövqeyi regionda sülhün və sabitliyin bərqərar olmasına əngəldir" -RƏY
Azərbaycan Xarici İşlər Nazirliyinin mətbuat katibi Ayxan Hacızadənin İslam Əməkdaşlıq Təşkilatının İstanbul Xarici İşlər Nazirləri Şurasında qəbul olunmuş qərarlarla bağlı Ermənistan Xarici İşlər Nazirliyinin bəyanatına dair şərh verib. Bildirilib ki, rəsmi Bakı Ermənistan Xarici İşlər Nazirliyinin “İstanbul Bəyannaməsi” və İslam Əməkdaşlıq Təşkilatının (İƏT) Xarici İşlər Nazirləri Şurasının 51-ci sessiyasında qəbul edilmiş qətnamələrlə bağlı 23 iyun 2025-ci il tarixli əsassız bəyanatını qətiyyətlə rədd edir.
Diqqətə çatdırılıb ki, Ermənistanın bu sənədlərin məzmununu təhrif etmək və tarixi faktları saxtalaşdırmaq cəhdi onun sülh prosesinə xələl gətirmək və beynəlxalq ictimaiyyəti çaşdırmaq səylərinin daha bir nümunəsidir.
"İƏT-in qəbul etdiyi qətnamələr, o cümlədən “indiki Ermənistan ərazisindən zorla və sistemli şəkildə qovulmuş azərbaycanlıların geri qayıtmaq hüququ” adlı qətnamə tarixi faktları əks etdirir və beynəlxalq hüquq və ədalət prinsiplərinə əsaslanır. Ermənistanın iddialarının əksinə olaraq, azərbaycanlıların indiki Ermənistandan sistemli şəkildə qovulması könüllü deyil, zorakılıq, hədə-qorxu və insan hüquqlarının kobud şəkildə pozulması ilə yadda qalıb. İƏT-in azərbaycanlıların geri qayıtmaq hüququnu dəstəkləməsi Ermənistanın əsassız şəkildə təqdim etdiyi “ərazi iddiası” deyil, ədalətə və onların fundamental hüquqlarının bərpasına çağırışdır.
700 mindən artıq azərbaycanlını köçkün vəziyyətinə salmış və 2023-cü ildə Azərbaycanın suverenliyinin bərpası ilə yekunlaşmış Azərbaycan ərazilərinin Ermənistan tərəfindən təxminən 30 il davam edən qanunsuz işğalı kontekstini nəzərə alaraq, Ermənistanın 2023-cü il antiterror tədbirlərinə dair iddiası da eyni dərəcədə əsassızdır", - A.Hacızadənin şərhində vurğulanıb.
"İƏT-in Xocalı soyqırımı ilə bağlı Ermənistanın “təhrif olunmuş şərh” kimi rədd etdiyi qətnaməsi 1992-ci ilin fevralında Xocalıda qadın və uşaqlar daxil olmaqla, 613 dinc sakinin vəhşicəsinə qətlə yetirilməsi zamanı Ermənistan silahlı qüvvələrinin törətdiyi qəddarlıq barədə danılmaz həqiqəti bir daha təsdiq edir. İnsanlıq əleyhinə bu cinayət beynəlxalq insan haqları təşkilatları tərəfindən sənədləşdirilib və bir çox ölkələr tərəfindən tanınıb. Ermənistanın, bu və digər hərbi cinayətlərə, o cümlədən işğal zamanı Azərbaycanın mədəni irsinin dağıdılmasına görə məsuliyyətini etiraf etməkdən yayınması onun sülh prosesində etibarını daha da sarsıdır.
Ermənistanın sülhə sadiqlik iddiası onun hərəkətləri ilə uyğun gəlmir. Azərbaycan ardıcıl olaraq, ərazi bütövlüyü və suverenliyə qarşılıqlı hörmət əsasında hərtərəfli sülh sazişinin tərəfdarı olduğu halda, Ermənistan dəfələrlə kritik məsələlər üzrə qeyri-konstruktiv mövqe nümayiş etdirməklə tərəqqiyə mane olub.
İƏT-in Ermənistanı gecikmədən sülh sazişinin imzalanmasına maneələri aradan qaldırmağa çağırması beynəlxalq ictimaiyyətin Cənubi Qafqazda davamlı sabitliyi təmin edən həll üzrə gözləntiləri ilə üst-üstə düşür.
Ermənistanın İƏT-in prinsipial mövqeyini siyasiləşdirmək və öz hərəkətlərinə görə məsuliyyətdən yayınmaq cəhdləri Azərbaycanı ədalətli və davamlı sülh əldə etmək səylərindən çəkindirməyəcək. Ermənistanı revizionist ritorikasından əl çəkməyə və tarixi məsuliyyətlərini etiraf etməyə çağırırıq", - XİN rəsmisi əlavə edib.
Milli Məclisin deputatı, Ana Vətən Partiyasının sədr müavini Günay Ağamalı Crossmedia.az-a olan açıqlamasında Ermənistanın “İstanbul Bəyannaməsi” ilə bağlı əsassız və qərəzli bəyanatına münasibət bildirib: " Azərbaycan Xarici İşlər Nazirliyinin Ermənistanın bu bəyanatını qətiyyətlə rədd etməsi tamamilə haqlıdır. Rəsmi İrəvanın destruktiv mövqeyi regionda sülhün və sabitliyin bərqərar olunmasına deyil, əksinə, mövcud reallıqları və beynəlxalq hüququn norma və prinsiplərini inkar etməyə yönəlib. Ermənistan tarixi saxtalaşdırmaq cəhdlərini uzun illərdir davam etdirir. Bu isə onların dəyişməz siyasətinə çevrilib. Ermənistan hakimiyyəti bu yolla həm daxili auditoriyanı aldatmağa, həm də beynəlxalq ictimaiyyətin diqqətini regionda sülhün əsas maneəsi olan revanşist niyyətlərindən yayındırmağa çalışır”.
G.Ağamalı qeyd edib ki, bu cəhdlər artıq heç bir nəticə verməyəcək: "Azərbaycanın mövqeyi isə həm tarixi faktlara, həm də beynəlxalq hüququn prinsiplərinə əsaslanır və rəsmi Bakı bölgədə dayanıqlı sülhün təmininə dair iradəsini ardıcıl şəkildə nümayiş etdirir. Ermənistan növbəti dəfə yanlış yolda olduğunu sübut edir. Bu kimi əsassız iddialar və təxribatçı ritorika regionda dayanıqlı sülhə nail olmaq əvəzinə, vəziyyəti gərginləşdirməyə xidmət edir. Bölgədə qalıcı sülh və əməkdaşlığın bərqərar olması üçün tarixi faktlara və beynəlxalq hüququn tələblərinə əməl olunmalıdır. Nikol Paşinyan administrasiyası süni iddialardan və təxribatdan uzaq durmalıdır. Əgər Ermənistan konstruktiv mövqe nümayiş etdirmək əvəzinə, təxribatçı ritorikaya davam edərsə, bu, ölkənin regionda formalaşan yeni geosiyasi reallıqlardan kənarda qalması və özünü təcrid vəziyyətinə salması ilə nəticələnəcək".
Fatimə Nəbiyeva
14:58 24.06.2025
Oxunuş sayı: 1343
