DYP rəsmisi Crossmedia.az-a açıqlama verdi, sürücü və piyadalara müraciət etdi
Şəhərdaxili və mərkəzi yollarda müşahidə olunan əsas problemlərdən biri də « zebra» adlanan piyada keçidlərində işıqforun olmamasıdır. İşıqforun olmadığı piyada keçidləri bəzi piyadaıarda müəyyən çaşqınlıq yaradır. Hətta bəzən sonu yol qəzası ilə nəticələnən hadisələr də olur. Məsələ burasındadır ki, işıqfor olmayan «zebra »larda piyadalar yolu keçməyə tərəddüd edirlər. Bu tərəddüdün əsas səbəbi isə nəinki yol vermək, hətta sürəti azaltmaq niyyətində olmayan sürücülər və onların hərəkətini tənzimləyəcək işıqforun olmamasıdır. Maraqlıdır, belə situasiyalarda oiyadalar necə davranmalıdır?
Mövzu ilə bağlı Daxili İşlər Nazirliyinin Bakı Dövlət Yol Polisi İdarəsinin rəsmisi Mübariz Ağayev Crossmedia.az-a açıqlama verib : «Piyada keçidləri müxtəlif formalarda olur. Yerüstü, yeraltı və eyni səviyyəli keçidlər mövcuddur. Xalq arasında “zebra” adlandırılan keçidlər məhz eyni səviyyəli piyada keçidləridir. Yol hərəkətinin təşkilində bu keçidlərin hər biri istifadə olunur. Əgər eyni səviyyəli piyada keçidindən söhbət gedirsə, burada da müəyyən qaydalar mövcuddur. Lakin bu cür keçidlərin hər birinin yanında təhlükəsizlik üçün xüsusi qurğuların quraşdırılması mümkün deyil. Yəni belə bir yanaşma dünyada mövcud deyil. Çünki bu keçidlərin özü artıq hərəkətin təşkilidir”.
Müsahibimiz qeyd edib ki, eyni səviyyəli keçidlərə yaxınlaşan nəqliyyat vasitələri öncədən yol nişanları və nişanlanma xətləri vasitəsilə xəbərdar edilir : « Piyada keçidinin yanında məlumatverici nişanlar da quraşdırılır. Bu, sürücüyə həmin yolda piyada keçidinin olduğunu bildirir. Əgər piyada artıq həmin keçidə daxil olubsa, təbii ki, sürücü nəqliyyat vasitəsini dayandırmalı və piyadaya yol verməlidir. Yol vermək anlayışı mürəkkəb məsələdir. İnzibati Xətalar Məcəlləsinə əsasən, sürücü nəinki piyadanı buraxmalı, hətta onun hərəkət trayektoriyasına müdaxilə etməməlidir: Yəni piyadanın hərəkət istiqamətini, sürətini dəyişməyə məcbur etməməlidir. Xüsusilə eyni səviyyəli piyada keçidlərinə yaxınlaşan sürücülər nişan və nişanlanma xətlərinin tələblərinə qeydsiz-şərtsiz əməl etməlidirlər”.
M.Ağayev əlavə edib ki, dövlət tərəfindən bu istiqamətdə müvafiq tədbirlər görülür : « Belə keçidlərin yerləşdiyi ərazilərdə yol nişanları və nişanlanma xətləri quraşdırılır, maarifləndirici qısa filmlər çəkilir və tətbiq olunur.Sürücələrlə yanaşı, piyadaların da diqqətli olması vacibdir. Çünki bu cür keçidlər piyadalar üçün də riskli hesab olunur. Piyada keçidindən keçmək istəyən şəxs əvvəlcə yolun hər iki istiqamətində nəqliyyat vasitəsinin yaxınlaşıb-yaxınlaşmadığını qiymətləndirməli, yalnız təhlükə olmadıqda keçidə daxil olmalıdır. Piyadalar keçidi ən qısa müddətdə keçməli, amma qaçmadan və diqqətli şəkildə hərəkət etməlidirlər. Çoxzolaqlı yollarda daha ciddi təhlükə yaranır. Belə ki, bir nəqliyyat vasitəsi piyada keçidində dayanarkən piyada düşünür ki, digər zolaqlarda hərəkət edən maşınlar da dayanacaq. Lakin bəzən həmin maşınlar dayanmayaraq qəza riskini artırır. Piyada bir avtomobilin dayanmasına arxayın olub digər hərəkət zolaqlarında hərəkət edən maşınları görmədən yola çıxır və qəflətən yol-nəqliyyat hadisəsi baş verir. Halbuki həmin zolaqda hərəkət edən nəqliyyat vasitəsinin sürücüsü də dayanmış avtomobili görüb ehtiyatlı davranmalı idi”.
M.Ağayevin fikrincə, belə halların baş verməməsi üçün yol hərəkətinin bütün iştirakçıları – həm sürücülər, həm də piyadalar qaydalara ciddi şəkildə əməl etməlidirlər: “Piyadaların təhlükəsiz şəkildə yolu keçməsini təmin etmək sürücülərin borcudur. Eyni zamanda piyadalar da məsuliyyətli davranmalı, hərəkəti düzgün qiymətləndirməlidirlər. Piyadaların təhlükəsizliyi üçün həm sürücülər, həm də piyadalar yol nişanlarına və nişanlanma xətlərinə qeydsiz-şərtsiz əməl etməlidirlər. Piyadalar yol hərəkətinin ən müdafiəsiz iştirakçılarındandır və onların təhlükəsizliyi hər bir sürücünün diqqətində olmalıdır. Eyni zamanda piyadalar da qarşı tərəfdən gələn avtomobillərin məsafəsini və sürətini düzgün təhlil edərək ehtiyatlı davranmalıdırlar»
Fatimə Nəbiyeva
19:46 20.06.2025
Oxunuş sayı: 1204
