"BP Qarbaağda həyata keçirilən yenidənqurma işlərində iştirak edə bilər" -DEPUTATDAN anons
Azərbaycan Prezidenti İlham Əliyev iyunun 19-da BP şirkətinin baş icraçı direktoru Mürrey Aukinklossu qəbul edib. Söhbət zamanı uzun illərdir Azərbaycanla BP arasında uğurlu əməkdaşlığın həyata keçirildiyi məmnunluqla vurğulanıb.
Ölkədə enerji resurslarından əldə olunan gəlirlərin səmərəli şəkildə Azərbaycanın sosial-iqtisadi inkişafına yönləndirildiyi qeyd edilib.
Bir sıra Avropa dövlətlərinin enerji təhlükəsizliyinin təmin edilməsində Azərbaycanın roluna toxunulub, ölkədə karbohidrogen enerji resursları ilə bərabər bərpaolunan enerji mənbələrinin də böyük potensialının olduğu vurğulanıb. Bu xüsusda BP şirkətinin işğaldan azad edilmiş ərazilərdə həyata keçirdiyi layihənin əhəmiyyəti qeyd olunub.
Görüşdə SOCAR ilə BP arasında əməkdaşlığın perspektivlərinə dair fikir mübadiləsi aparılıb.
Azərbaycanla Britaniyanın məşhur şirkəti ilə əməkdaşlıq barədə Crossmedia.az-a danışan Milli Məclisin deputatı Arzuxan Əlizadə BP-nin Azərbaycanda uzun illərdir fəaliyyət göstərdiyini qeyd edib: "Bu şirkət otuz ildən artıqdır ki, müxtəlif layihələr həyata keçirərək Azərbaycanın iqtisadi inkişafına mühüm töhfələr verib. Azərbaycan hökuməti ilə bu illər ərzində formalaşmış əməkdaşlıq təcrübəsi də müsbət qiymətləndirilir. Xüsusilə neft sektorunda əldə olunmuş irəliləyişlər bu tərəfdaşlığın nəticəsidir”.
Deputat qeyd edib ki, bu müsbət təcrübənin işğaldan azad olunmuş ərazilərdə də davam etməsi gözləniləndir:
“İndi əsas prioritetlərdən biri Qarabağın tezliklə abadlaşdırılması və əhalinin doğma yurduna qayıdışının təminidir. Bu istiqamətdə müxtəlif infrastruktur layihələri həyata keçirilir. BP şirkətinin bu prosesdə iştirakı da istisna deyil. Hazırda konkret layihələrlə bağlı məlumatlar dəqiqləşdirilir, amma əminik ki, razılaşdırılacaq istənilən əməkdaşlıq Qarabağın bərpasına müsbət töhfə verəcək. Buna inamımız var".
15:38 19.06.2025
Oxunuş sayı: 9077
