İlham Əliyev və Paşinyan Türkiyəyə gedir – Üçtərəfli görüş keçirilə bilərmi? - DEPUTAT
Türkiyə prezidenti Rəcəb Tayyib Ərdoğanın dəvətinə əsasən Prezident İlham Əliyev bu gün Türkiyəyə səfər edəcək. Bir gün sonra Ərdoğanın dəvətinə əsasən Ermənistanın Baş naziri Nikol Paşinyan da Türkiyəyə gedəcək. Bu ardıcıllıq Türkiyənin Azərbaycan-ermənistan münasibətlərinin tənzimlənməsindəki rolunun güclənəcəyi, üçtərəfli görüş ola biləcəyi ehtimalını yenidən gündəmə gətirib.
Mövzu ilə bağlı Deputat Aydın Mirzəzadə Crossmedia.az-a açıqlama verib. A.Mirzəzadənin sözlərinə görə, Türkiyə və Ermənistan arasında diplomatik əlaqələrin olmamasına baxmayaraq, bu səfər Ermənistan rəhbərinin Türkiyəyə ilk rəsmi səfəri kimi tarixə düşür. Deputat hesab edir ki, bu faktın özü belə göstərir ki, regionda artıq möhkəm sülhün bərqərar olması üçün imkanlar günü-gündən genişlənir.
Deputat bildirib ki, Ermənistan tərəfinin Türkiyə və Azərbaycanla münasibətləri yaxşılaşdırmaq istəyinə müsbət yanaşır. “Əgər Ermənistan doğrudan da möhkəm sülh istəyirsə, Azərbaycan və Türkiyə ilə yaxşı münasibətlər istəyirsə, o zaman beynəlxalq hüquq normalarına, mehriban qonşuluq məsələlərinə açıq ürəklə yanaşmalıdır” – deyə A.Mirzəzadə vurğulayıb.
Onun sözlərinə görə, daha davamlı və möhkəm sülh üçün Ermənistan tərəfi iki əsas şərti yerinə yetirməlidir. Bunlardan biri ölkə konstitusiyasından Azərbaycana qarşı ərazi iddialarının çıxarılması, digəri isə ATƏT-in Minsk qrupunun buraxılması ilə bağlı rəsmi müraciətin təqdim olunmasıdır.
Deputat qeyd edib ki, istənilən halda bu səfər məsələnin həlli imkanlarını genişləndirə bilər. O, hesab edir ki, bu görüş Ermənistan tərəfinin Türkiyə və Azərbaycanın obyektiv şərhlərini anlamasına kömək edəcək.
Aydın Mirzəzadə əlavə edib ki, Ərdoğan-Əliyev-Paşinyan arasında üçtərəfli görüş məsələsini mümkün hesab edir. Onun sözlərinə görə, Azərbaycanın təşəbbüsü ilə vaxtaşırı belə formatda görüşlər keçirilir və bu da sülh prosesinə müsbət təsir göstərir.
“Bu səfərin özü də gərginliyin müəyyən qədər azalmasına kömək edən bir faktor ola bilər” – deyə deputat fikrini yekunlaşdırıb.
Fatimə Nəbiyeva
11:01 19.06.2025
Oxunuş sayı: 708
