Azərbaycan tələbini sərtləşdirdi: Ermənistan təzminat ödəməlidir
İşğaldan azad olunmuş ərazilərdə mina təhlükəsi bu gün Azərbaycanın qarşısında duran ən ciddi humanitar problemlərdən biridir. Bu problem təkcə fiziki təhlükə yaratmaqla kifayətlənmir, həm də insanların fundamental hüquqlarına – xüsusilə də təhlükəsiz yaşamaq və doğma yurdlarına qayıtmaq hüququna ciddi şəkildə xələl gətirir. Nəzərə alsaq ki, hazırda Qarabağa tam şəkildə məskunlaşma prosesi başa çatmayıb, buna rəğmən Ermənistanın mina terrorunun qurbanlarının sayı 400 ü ötüb.
Mövzu ilə bağlı politoloq Oqtay Qasımov Crossmedia.az-a açıqlamasında Ermənistanın mina terrorunun yaratdığı problemlərdən danışıb:
“Bu problemlər ondan ibarətdir ki, Ermənistan işğalı altında saxladığı əraziləri zamanında talan etmək və dağıtmaqla böyük vandalizmə imza atıb. Bu ərazilər artıq yaşanmaz vəziyyətdədir və yenidən bərpası da uzun illər və böyük vəsaitlər tələb edir. Bütün bunlarla yanaşı Azərbaycan ciddi bir mina terroru təhlükəsi ilə üz-üzədir. 44 günlük Vətən müharibəsi bitəndən sonra 400-ə yaxın Azərbaycan vətəndaşı mina terrorunun qurbanı olub. Ermənistan da öz cinayətlərini hazırkı şəraitdə yumşaltmaq üçün Azərbaycana dəqiq mina xəritələrini təqdim etməlidir. Ermənistanın atdığı addımlar beynəlxalq hüquqa zidd və humanitar hüququn pozulması, eyni zamanda terrordur. Təəssüf ki, hazırda beynəlxalq hüquq işlək vəziyyətdə deyil. Bu gün dünyada ikili standartlar hökm sürür və beynəlxalq məhkəmələrdə siyasi təsir altındadır. Çox güman ki, Azərbaycan hansısa məqamda beynəlxalq məhkəməyə müraciət edəcək. Amma hazırkı şəraitdə sülh müqaviləsinin imzalanması digər məsələləri arxa planda saxlayır. Sülh müqaviləsi imzalandıqdan sonra bu məsələlər ya razılaşma yolu ilə yada beynəlxalq məhkəmədə öz həllini tapmalı, Ermənistan hökmən təzminat ödəməlidir. Düşünürəm ki, Azərbaycan hansısa məqamda bu addımı atacaq”.
Ayhan Ağarzayev
17:57 18.06.2025
Oxunuş sayı: 9481
