İranı tərk etmək istəyən xarici ölkə vətəndaşlarına Azərbaycanın dəstəyi - Deputat açıqladı
İran İslam Respublikası ilə İsrail dövləti arasında baş verən münaqişə bölgədə vəziyyəti son dərəcə mürəkkəbləşdirib. Artıq bu qarşıdurma regionun sabitliyi və təhlükəsizliyi üçün də ciddi təhdidə çevrilib. Belə bir vəziyyətdə beynəlxalq ictimaiyyətin, o cümlədən region dövlətlərinin tutduğu mövqe olduqca vacibdir. Azərbaycan isə hər zaman olduğu kimi, bu gün də bölgədə sülhün və əmin-amanlığın təmin olunmasına çalışır. Nəinki qonşu dövlətlərə qarşı neytrallığını qoruyur, həm də zəruri humanitar missiya yerinə yetirir, İranda çətin vəziyyətdə olan xarici vətəndaşların təxliyəsinə dəstək olur.
Məsələylə bağlı Crossmedia.az-a açıqlama verən millət vəkili Anar İskəndərov bildirib ki, Azərbaycanın tutduğu mövqe beynəlxalq hüquqa və humanitar dəyərlərə əsaslanır.
Deputat qeyd edib ki, Azərbaycan heç vaxt başqa dövlətlərin ərazisində gözü olmayan, daim xalqların və millətlərin sülh və əmin-amanlıq şəraitində yaşamasını arzulayan bir dövlətdir: “Tarix boyu Azərbaycan hər zaman sülhün, sabitliyin tərəfdarı olub. Bu gün isə güc sahibi kimi, regionda sülhün qorunmasına dəstək vermək imkanına malikdir”.
Anar İskəndərov bildirib ki, hazırda İsrail və İran arasında münaqişə davam edir və hər iki tərəf bir-birinə qarşı müasir silahlardan istifadə edir. Nəticədə yüzlərlə günahsız insan həyatını itirir, yüz illərin zəhməti ilə tikilmiş evlər, binalar və dövlət müəssisələri məhv edilir.
Deputat əlavə edib ki, Azərbaycan bu münaqişəyə qarışmır, lakin hər zaman olduğu kimi, bu gün də qonşu ölkələrlə əmin-amanlığın təmin olunması üçün bütün mümkün addımları atır: “Azərbaycan bu məsələdə heç bir dövlətin marağını təmin etmir və tərəf tutmur. Əsas məsələ insanların təhlükəsizliyinin təmin olunması və onların ailələrinə qovuşmasıdır. Münaqişənin ilk anlarında cənab Prezident tərəfindən quru sərhəddən insanların rahat keçidi üçün dərhal göstəriş verildi və bu göstərişlər vicdanla yerinə yetirilir”.
Anar İskəndərov onu da bildirib ki, Azərbaycan bu istiqamətdə konkret humanitar fəaliyyətlərə başlayıb: “Rusiya Federasiyasından İran İslam Respublikasında fəaliyyət göstərən musiqi kollektivi Azərbaycan ərazisindən keçərək sağ-salamat öz vətənlərinə dönüb. Bu kimi əməliyyatlar davam etdiriləcək. Azərbaycanın gələcək siyasəti də sülh və əmin-amanlığın təmininə yönələcək.”
Zəhra Ağayeva
15:00 17.06.2025
Oxunuş sayı: 9236
