Dəyişən dünyada dəyişməz qətiyyətimiz: "Azərbaycanın sözü onun imzası qədər qüdrətli və etibarlıdır”
Prezident İlham Əliyev iyunun 15-də Şuşada “Yeni dünya nizamı: geosiyasi aspektlər və qlobal çağırışlar” mövzusunda keçirilən beynəlxalq konfransın iştirakçılarına müraciətində bildirib ki, ədalətli dünya nizamının tərəfdarı olduğunu hər zaman əməli fəaliyyəti ilə nümayiş etdirən Azərbaycan nəinki yerləşdiyi Cənubi Qafqaz regionunun, həm də bütövlükdə Avrasiyanın dialoq və əməkdaşlıq məkanına çevrilməsinin tərəfdarı kimi çıxış edir.
“Dost və tərəfdaş ölkələrlə birlikdə həyata keçirdiyimiz layihələr regional və beynəlxalq təhlükəsizliyə mühüm töhfələr verir, həm Şərq ilə Qərb, həm də Şimal ilə Cənub arasında konstruktiv və perspektivli işbirliyinə əlverişli zəmin yaradır. Dörd il ərzində Qoşulmama Hərəkatına sədrlik etmiş Azərbaycan Bandunq Prinsiplərinə daim sadiq qalaraq ədaləti, beynəlxalq hüququ və üzv ölkələrin qanuni maraqlarını qətiyyətlə müdafiə etmişdir”, – deyə dövlət başçısı vurğulayıb.
Azərbaycan liderinin səsləndirdiyi fikirlər və verdiyi mesajlar barədə Crossmedia.az-a danışan Milli Məclisin deputatı Elman Məmmədov bildirib ki, Prezidentin fikirləri Azərbaycanın dəyişməz siyasi xəttinin göstəricisidir: “Cənab Prezident həmişə bu məsələyə xüsusi önəm verir və Azərbaycanın mövqeyini birmənalı şəkildə bəyan edir: biz regionda, bütövlükdə isə dünyada sülhün tərəfdarıyıq. Azərbaycan bütün qonşu dövlətlərlə, həmçinin digər ölkələrlə əməkdaşlıq və sülh şəraitində yaşamaq yolunu seçib. Fəaliyyətimiz, atdığımız addımlar və həyata keçirdiyimiz siyasət bu mövqeyimizi tam şəkildə təsdiqləyir”.
E. Məmmədovun fikrincə, Azərbaycanın tutduğu mövqe həm regional, həm də beynəlxalq sabitlik üçün nümunədir: “Azərbaycan istər qonşu dövlətlərlə, istərsə də uzaq ölkələrlə münasibətdə hər zaman səmimi olub. Qarşı tərəfdən də eyni səmimiyyəti gözləmişik. Azərbaycanın Şərq-Qərb, Şimal-Cənub dəhlizləri, Avropanın enerji təhlükəsizliyinə verdiyi töhfələr, müstəmləkə altında saxlanılan Afrika ölkələrinə uzatdığı əməkdaşlıq və azadlıq əli bizim siyasətimizin göstəricisidir”.
Deputat əlavə edib ki, son günlərdə İsrail və İran arasında baş verən hərbi toqquşmalar fonunda Azərbaycan bir daha sülh tərəfdarı olduğunu əməli şəkildə göstərib:
“İrandan müxtəlif ölkə vətəndaşlarının təxliyəsində Azərbaycanın körpü rolunu oynaması, humanist və sülhpərvər mövqe nümayiş etdirməsi bunun əyani sübutudur. Biz hər zaman danışıqlar və qarşılıqlı anlayış yolu ilə problemlərin həllini dəstəkləmişik. Ən pis sülh, ən yaxşı müharibədən daha üstündür – bu prinsipi Azərbaycan həm yaşamış, həm də yaşatmış dövlətdir. 1988-dən 2023-cü ilə qədər yaşadığımız müharibə, dağıntılar, şəhidlər bizim sülhə olan bağlılığımızı daha da gücləndirir. Cənab Prezident dəfələrlə bildirib ki, Azərbaycanın sözü onun imzası qədər qüdrətli və etibarlıdır”.
Aybəniz Səfərova
14:40 16.06.2025
Oxunuş sayı: 21420
