"Fitch" Azərbaycanın investisiya reytinqini təsdiqləyib və ölkə həddini "BBB"yə qədər yüksəldib
Beynəlxalq reytinq agentliyi “Fitch Ratings” Azərbaycanın xarici valyutada uzunmüddətli emitent defolt reytinqini (EDR) “BBB-” səviyyəsində sabit proqnozla təsdiqləyib. Bu barədə “Fitch” məlumat yayıb.
“Azərbaycanın reytinqi çox güclü xarici balansı, “BBB” reytinq kateqoriyasında ən aşağı dövlət borcu göstəricilərindən birini və maliyyələşdirmə çevikliyini təmin edən əhəmiyyətli suveren aktivlərin mövcudluğunu əks etdirir”, – agentliyin hesabatında deyilir.
Digər tərəfdən, məhdudlaşdırıcı amillər arasında karbohidrogen sektorundan yüksək asılılıq; davam edən geosiyasi risklər, yaxşılaşsa da, hələ də həssas iqtisadi siyasət strukturu göstərilir.
“Fitch” həmçinin Azərbaycanın ölkə həddini “BBB-”dən “BBB”yə yüksəldib və valyuta nəzarəti risklərinin azaldığını qeyd edib. Müsbət amillər arasında iqtisadiyyatda xarici valyutanın adekvat təklifi, maliyyə sisteminin dollarlaşmasının azalması, Mərkəzi Bankın likvidlik idarəetməsinin yaxşılaşması, məzənnə sabitliyini dəstəkləyən etibarlı valyuta ehtiyatları və xarici valyutada ifadə olunan Dövlət Neft Fondunun aktivləri qeyd olunur.
“Fitch”in öz reytinq modelinə (SRM) əsasən, Azərbaycan “BB+” səviyyəsinə uyğun hesablama qiyməti alıb, lakin yekun reytinq əlavə amillər əsasında “BBB-” səviyyəsinə yüksəldilib.
Hesabata görə, EDR reytinqindən bir pillə yuxarı təyin edilmiş ölkə həddi kapital hərəkətinə və ya valyuta əməliyyatlarına məhdudiyyətlərin tətbiqi ilə bağlı orta səviyyəli riskləri əks etdirir. “Fitch” model nəticələrinə əlavə keyfiyyət düzəlişləri tətbiq etməyib.
“Fitch” Azərbaycanın reytinqinin yüksəldilməsinə səbəb ola biləcək bir neçə şərti vurğulayır. Bunların arasında xarici şoklara qarşı dayanıqlılığı artıran iqtisadi və institusional siyasətin daha da gücləndirilməsi; yüksək neft və qaz gəlirləri fonunda suveren aktivlərin davamlı artırılması; idarəetmənin yaxşılaşdırılmasına, iqtisadi artıma və diversifikasiyaya yönəlmiş struktur islahatlarının uğurla həyata keçirilməsi var.
08:38 14.06.2025
Oxunuş sayı: 7400
