Daha bir qanun layihəsi Milli Məclisin plenar iclasına tövsiyə olunub
İyunun 13-də Milli Məclisin Aqrar siyasət komitəsinin iclası keçirilib.
Crossmedia.az xəbər verir ki, komitə sədri Tahir Rzayev iclasda bir məsələnin - Torpaq Məcəlləsində, Mülki Məcəllədə, Mənzil Məcəlləsində, Şəhərsalma və Tikinti Məcəlləsində, “Bələdiyyə torpaqlarının idarə edilməsi haqqında”, “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamənin təsdiq edilməsi barədə” və “Daşınmaz əmlakın dövlət reyestri haqqında qanunlarda dəyişiklik edilməsi barədə “qanun layihəsinin birinci oxunuşda müzakirə ediləcəyini bildirib.
Azərbaycan Respublikası Prezidentinin 2022-ci il 7 aprel tarixli 1656 nömrəli Fərmanı ilə təbii fəlakət, texnogen qəza və ya hərbi əməliyyat nəticəsində (işğaldan azad edilmiş ərazilər istisna olmaqla) yararsız hala düşmüş və ya məhv olmuş yaşayış sahələrinin əvəzinə dövlət vəsaiti hesabına inşa olunmuş yeni yaşayış evləri və çoxmənzilli binaların sənədləşdirilməsi məsələlərinin hüquqi baxımdan tənzimləndiyi bildirilib.
Qeyd olunub ki, sözügedən fərman çərçivəsində tikintiyə və istismara icazə sənədlərinin təqdim edilməsi, bu sənədlər əsasında mülkiyyət hüquqlarının daşınmaz əmlakın dövlət reyestrində qeydiyyata alınması, həmçinin lazım gəldikdə ölçmə planlarının hazırlanması və torpaq sahələrinin kateqoriyasının dəyişdirilməsi kimi məsələlər tənzimlənib. Yaşayış evləri bələdiyyə mülkiyyətində olan torpaq sahələrində inşa edildiyi hallarda, həmin bələdiyyələrə müvafiq dəyərdə dövlət torpaqlarının ayrılması və bu torpaq sahələrinin yaşayış məntəqələri kateqoriyasına keçirilməsini təmin edəcək.
Daha sonra Milli Məclis Aparatının İqtisadi qanunvericilik şöbəsinin müdiri Məhəmməd Bazıqov qanun layihəsi barədə məlumat verərək, layihədə təbii fəlakət, texnogen qəza və ya hərbi əməliyyat nəticəsində (işğaldan azad edilmiş ərazilər istisna olmaqla) məhv olmuş və ya yararsız vəziyyətə düşmüş yaşayış sahələrinin əvəzinə dövlət vəsaiti hesabına yeni yaşayış evlərinin və çoxmənzilli binaların tikintisinin, torpaq sahələrinin ayrılmasının, daşınmaz əmlakın qeydiyyatının və tikinti prosedurlarının sadələşdirilməsinin nəzərdə tutulduğunu bildirib.
Məlumat verilib ki, qanun layihəsinə tikinti məqsədilə torpaq sahələrinin dövlət ehtiyat fondundan, bu mümkün olmadıqda isə bələdiyyə mülkiyyətində olan torpaqlardan ayrılması, habelə həmin ərazilərdə tikinti məqsədəuyğun hesab edilmədikdə, alternativ torpaq sahələrinin ayrılması və ya həmin sahələrin dəyərinin ödənilməsi şərti ilə rekvizisiya olunması daxildir.
Eyni zamanda, “Bələdiyyə torpaqlarının idarə edilməsi haqqında” Qanuna və digər müvafiq hüquqi aktlara əsasən, bələdiyyə mülkiyyətində olan torpaqlarda yeni yaşayış evlərinin və çoxmənzilli binaların tender və ya hərrac keçirilmədən inşasına şərait yaradan hüquqi mexanizmlər yaradılır.
Bildirilib ki, Mülki Məcəlləyə və “Daşınmaz əmlakın dövlət reyestri haqqında” Qanuna dəyişikliklər yeni yaşayış binalarındakı mənzillərin dövlət qeydiyyatına alınması üçün hüquqi əsasların və tələb olunan sənədlərin müəyyən edilməsini əhatə edir. Mənzil Məcəlləsinə ediləcək əlavə ilə dövlət vəsaiti hesabına tikiləcək yaşayış sahələrinin, o cümlədən icbari sığortası olan əmlakın yenidən təmin olunması hüquqi cəhətdən mümkün olacaq.
Komitə üzvləri Azər Badamov, Vüqar İsgəndərov, Eldar İbrahimov qanun layihəsi ilə bağlı fikirlərini bölüşüblər.
Müzakirələrin sonunda qanun layihəsi birinci oxunuşda Milli Məclisin plenar iclasına tövsiyə olunub.
20:27 13.06.2025
Oxunuş sayı: 8250
