Keçmiş nazir: "Prezidentin dediklərini şərh etməyə ehtiyac olduğunu düşünmürəm"
Azərbaycan Prezidenti İlham Əliyev rusiyalı həmkarı Vladimir Putini təbrik edib.
Təbrikdə deyilir:
"Hörmətli Vladimir Vladimiroviç.
Dövlət bayramı- Rusiya Günü münasibətilə səmimi təbriklərimi və xoş arzularımı qəbul edin.
Azərbaycan və Rusiya xalqlarını əsrlər boyu ənənəvi sıx dostluq, mehriban qonşuluq və qarşılıqlı dəstək münasibətləri birləşdirir. Bu gün həmin nəcib ənənələr dövlətlərarası əlaqələrimizin hərtərəfli inkişafı və məsələlərin geniş spektri üzrə əməkdaşlığın dərinləşdirilməsi üçün etibarlı bünövrədir.
Əminəm ki, dost xalqlarımızın və ölkələrimizin maraqları naminə biz bundan sonra da Azərbaycan-Rusiya münasibətlərinin möhkəmlənməsi, strateji tərəfdaşlıq və müttəfiqlik ruhunda çoxplanlı qarşılıqlı fəaliyyətin genişləndirilməsi üçün bütün səyləri göstərəcəyik.
Hörmətli Vladimir Vladimiroviç, bu əlamətdar gündə Sizə möhkəm cansağlığı və uğurlar, Rusiyanın bütün vətəndaşlarına isə əmin-amanlıq və tərəqqi arzulayıram".
Təbrikdə verilən mesajlar ikitərəfli münasibətlərdəki "soyuq küləklərin" aradan qalxacağına işarə ola bilərmir?
Keçmiş xarici işlər naziri Elmar Məmmədyarov bu barədə Crossmedia.az-a danışarkən deyib ki, dövlət başçısı hər zaman dəqiq və əsaslı ifadələrdən istifadə edir:
“Cənab Prezident nə deyirsə, dəqiq deyir. Onun Azərbaycanın inkişafında hansı nailiyyətlərə imza atdığını hamımız görürük. Ona görə də Prezidentin dediklərini şərh etməyə ehtiyac olduğunu düşünmürəm. Ölkə lideri nə deyirsə, dəqiq deyir".
Fatimə Nəbiyeva
16:17 12.06.2025
Oxunuş sayı: 8558
