Şuşa Bəyannaməsi regionun gələcək inkişafının istiqamətlərini müəyyənləşdirir — AÇIQLAMA
Şuşa Bəyannaməsi Azərbaycan və Türkiyə arasında strateji tərəfdaşlığın rəsmi təsdiqi və gələcək əməkdaşlığın yol xəritəsidir. 15 iyun 2021-ci ildə Qarabağın mədəni mərkəzi Şuşada imzalanan bu sənəd iki qardaş xalqın tarixi bağlarını möhkəmləndirərək siyasi, iqtisadi və hərbi sahələrdə əməkdaşlığın yeni mərhələyə keçməsinə zəmin yaradıb. Bu bəyannamə regional sabitlik və təhlükəsizliyin gücləndirilməsi baxımından da mühüm əhəmiyyət daşıyır.
Mövzu ilə bağlı Crossmedia.az-a açıqlama verən Milli Məclisin deputatı Pərvanə Vəliyeva ilk olaraq bildirib ki, 2021-ci il 15 iyun tarixində Azərbaycan və Türkiyə prezidentləri İlham Əliyev və Rəcəb Tayyib Ərdoğan tərəfindən Şuşada imzalanan “Müttəfiqlik münasibətləri haqqında Şuşa Bəyannaməsi” iki ölkə arasında münasibətlərin keyfiyyətcə yeni mərhələyə keçidini təsdiqləyən tarixi sənəddir:
“Bu bəyannamə yalnız ikitərəfli münasibətlər üçün deyil, eyni zamanda Cənubi Qafqaz və daha geniş regionda geosiyasi dinamikanın formalaşması baxımından strateji əhəmiyyət daşıyır. Bu sənədin Şuşa şəhərində imzalanması təkcə coğrafi və siyasi deyil, eyni zamanda simvolik məna daşıyır. Məhz bu şəhər İkinci Qarabağ müharibəsinin ən böyük rəmzlərindən biridir və burada imzalanmış sənəd bir növ azadlığın, qardaşlığın və yeni regional nizamın təntənəsidir. Bəyannamədə Mustafa Kamal Atatürkün və Heydər Əliyevin tarixi kəlamlarına istinad edilməsi sənədə ideoloji dərinlik və tarixi davamlılıq qazandırır.
Sənəddə əksini tapan hərbi əməkdaşlıq müddəaları xüsusilə diqqətəlayiqdir. Müdafiə sənayesi sahəsində təcrübə mübadiləsi, birgə təlimlər və texnologiya paylaşımı iki ölkənin hərbi potensialını gücləndirir. Bu, eyni zamanda, regiondakı potensial təhdidlərə qarşı birgə cavab mexanizmi formalaşdırır və Ermənistan daxilindəki revanşist dairələrə ciddi siqnal göndərir. Şuşa Bəyannaməsi yalnız siyasi və təhlükəsizlik məsələləri ilə məhdudlaşmır. Qarşılıqlı investisiya təşviqi, ticarət-iqtisadi əlaqələrin şaxələndirilməsi və enerji layihələri sahəsində əməkdaşlıq ölkələrin iqtisadi inteqrasiyasını dərinləşdirir”.
Deputatın sözlərinə görə, Zəngəzur dəhlizi bu baxımdan mühüm layihədir:
“Dəhliz Şərqlə Qərbi birləşdirəcək yeni nəqliyyat arteriyası regional iqtisadiyyatın canlanmasına şərait yaradacaq. Bəyannamə diaspor, media və təhsil sahəsində də əməkdaşlığı gücləndirməyi nəzərdə tutur. Xaricdəki türk və azərbaycanlı icmaların əlaqələndirilməsi, birgə informasiya platformalarının yaradılması və humanitar diplomatiyanın gücləndirilməsi beynəlxalq arenada birgə fəaliyyət imkanlarını artırır. Şuşa Bəyannaməsi Cənubi Qafqazda post-müharibə dövrünün geosiyasi konturlarını müəyyənləşdirən əsas sənədlərdən biridir. Bu sənəd regionun gələcək inkişafının istiqamətlərini müəyyənləşdirir: sülh, sabitlik, inteqrasiya və qarşılıqlı fayda əsasında yeni əməkdaşlıq mühiti formalaşdırır. Şuşa Bəyannaməsi Azərbaycan-Türkiyə münasibətlərində yalnız bir dostluq və əməkdaşlıq bəyanatı deyil, iki dövlətin bir-birinin təhlükəsizliyi, rifahı və beynəlxalq nüfuzu uğrunda ortaq hədəflərə doğru irəliləməyə hazır olduqlarını nümayiş etdirən strateji çərçivədir”.
Nəzrin Salmanova
14:16 11.06.2025
Oxunuş sayı: 9349
