BDYPİ rəsmisi Crossmedia-ya danışdı, sürücülərə səsləndi
Qurban bayramı ilə əlaqədar qeyri-iş günlərində Azərbaycanda ümumilikdə 28 yol-nəqliyyat hadisəsi qeyd olunub.
Bunu Crossmedia.az-ın sorğusuna cavabında Daxili İşlər Nazirliyinin Bakı Dövlət Yol Polisi İdarəsinin İctimaiyyətlə əlaqələr şöbəsinin rəsmisi Mübariz Ağayev deyib.
O, qeyd edib ki, bu hadisələr nəticəsində neş nəfər dünyasını dəyişib: “Onlardan biri respublika əhəmiyyətli avtomobil yollarında, dördü isə Bakı şəhərində baş vermiş qəzalar zamanı həyatını itirib.
M. Ağayev bildirib ki, yol hərəkəti qaydalarına riayət etmək hər bir sürücünün və piyadanın əsas vəzifəsidir: “Yollarda bir anlıq diqqətsizlik və məsuliyyətsizlik insan həyatı bahasına başa gələ bilər. BDYPİ hərəkət iştirakçılarını, o cümlədən sürücüləri, yol hərəkəti qaydalarına ciddi şəkildə riayət etməyə, hərəkətdə olarkən diqqətli və məsuliyyətli davranmağa çağırır. Təhlükəsizlik tədbirlərinin gücləndirilməsi ilə yanaşı, hər bir fərdin diqqətli olması qəzaların sayını azaltmağa kömək edə bilər. BDYPİ bu sahədə həm maarifləndirmə işlərini, həm də nəzarət tədbirlərini davam etdirir ki, yollarda ölüm və xəsarətlə nəticələnən qəzaların qarşısı alınsın. Unutmayaq ki, yollarda bir anlıq diqqətsizlik və məsuliyyətsizlik insan həyatı bahasına başa gələ bilər”.
Fatimə Nəbiyeva
22:11 10.06.2025
Oxunuş sayı: 2120
