Cənubi Qafqazda hərbi aviasiya balansı dəyişir: Azərbaycan Pakistanla müqavilə imzaladı, Ermənistan Hindistana üz tutur
Cənubi Qafqazda hərbi-hava qüvvələrinin gücləndirilməsi istiqamətində ciddi dinamika müşahidə olunur.
Crossmedia.az xəbər verir ki, bu barədə Malayziyanın Defence Security Asia saytı yazıb.
Qeyd edək ki, Azərbaycan Pakistanla 4,6 milyard dollar dəyərində müqavilə imzalayaraq 40 ədəd JF-17 Thunder Block III döyüş təyyarəsi alacaq. Bu, Pakistan-Çin istehsalı olan platformanın ən böyük ixrac müqaviləsi hesab olunur. Bu addımdan sonra Ermənistan Hindistanla Su-30MKI təyyarələrinin alınması ilə bağlı yüksək səviyyəli danışıqlara başlayıb. Ekspertlərin fikrincə, Ermənistan daha bahalı Fransanın “Rafale” təyyarələri əvəzinə Hindistan istehsalı olan Su-30MKI-ləri seçə bilər.
Bildirək ki, RANE şirkətinin analitik direktoru Səm Lixtenşteyn qeyd edib ki, “Rafale” təyyarələrinin bəzi gözləntiləri doğrultmaması Ermənistanda strateji qərarların formalaşmasına təsir göstərə bilər. Azərbaycan isə JF-17 Block III təyyarələri ilə Rusiya istehsalı olan köhnə MiQ-29-ları əvəz etməyi planlaşdırır. Bu isə ölkənin döyüş qabiliyyətini və texnoloji üstünlüyünü artıracaq.
Yeni alınacaq JF-17 Block III təyyarələri beşinci nəsil texnologiyalarla — AESA radar sistemi və qabaqcıl radioelektron mübarizə avadanlıqları ilə təchiz olunub.
Defence Security Asia yazır ki, bu müqavilə ilə Çin və Pakistanın Cənubi Qafqazda nüfuzu artır, Rusiya isə bölgədə silah ixracında əvvəlki dominant mövqeyini itirmək riski ilə üzləşir.
Xumar Emilqızı
18:15 10.06.2025
Oxunuş sayı: 7981
