Hikmət Babaoğlu: Rusiyanın bu mövqeyi hörmətə layiq bir yanaşmadır
Rusiya Federasiyası Xarici İşlər Nazirliyinin rəsmi nümayəndəsi Mariya Zaxarovanın Qarabağın Azərbaycanın ərazisi olduğunu rəsmi şəkildə bəyan etməsi Azərbaycan cəmiyyətində müsbət qarşılanıb. Bu açıqlama daha əvvəl Ukrayna hadisələrini Vladimir Medinskinin uğursuz bir şəkildə Qarabağla müqayisəsi fonunda diqqət çəkib.
Milli Məclisin deputatı, siyasi elmlər doktoru, professor Hikmət Babaoğlu bu mövzuda Crossmedia.az-a açıqlama verib. Deputat bildirib ki, Zaxarovanın səsləndirdiyi fikirlər Rusiya-Azərbaycan münasibətlərinə yaraşan, təqdirəlayiq bir yanaşmadır. Onun sözlərinə görə, 2022-ci ilin fevralında imzalanan Müttəfiqlik Bəyannaməsi iki ölkə arasında münasibətlərin möhkəm təməllər üzərində qurulduğunu göstərir.
“Sözsüz ki, Rusiya və Azərbaycanın münasibətləri həm dünən, həm bu gün mühüm əhəmiyyət daşıyır və gələcək perspektivlər baxımından da olduqca böyükdür. Ona görə də bu cür açıqlamalar müsbət dəyərləndirilməlidir,” – deyə Babaoğlu vurğulayıb.
Professor Hikmət Babaoğlunun fikrincə, Zaxarovanın bu bəyanatı, əslində, Rusiyanın daha əvvəl dəfələrlə səsləndirdiyi rəsmi mövqeyinin təkrarıdır: “Mənə elə gəlir ki, bu açıqlama daha çox Medinskinin yanlışını düzəltmək məqsədi daşıyır.”
Deputat əlavə edib ki, Rusiya bu mövqeyini əvvəllər də dəfələrlə bəyan edib və Azərbaycanın ərazi bütövlüyünü tanıdığını açıq şəkildə göstərib. “Bu isə hörmətə və yüksək qiymətə layiq bir yanaşmadır,” – deyə Babaoğlu qeyd edib.
Zəhra Ağayeva
15:55 10.06.2025
Oxunuş sayı: 16888
