"Azərbaycanın Keniyada səfirlik açması Afrika ilə münasibətlərin dərinləşməsinə xidmət edir" - DEPUTAT
Azərbaycanın Keniyada səfirlik açması, ölkəmizin Afrika qitəsi ilə münasibətlərində yeni mərhələnin başlanğıcı hesab olunur. Bu addım diplomatik təmsilçiliyin coğrafiyasının genişlənməsi ilə yanaşı, iqtisadi, humanitar və siyasi sahələrdə əməkdaşlıq imkanlarını da artırır. Səfirliyin fəaliyyətə başlaması Azərbaycanın Afrika strategiyasını daha məqsədyönlü və davamlı şəkildə həyata keçirməsinə şərait yaradacaq.
Bu barədə Milli Məclisin deputatı Elnarə Akimova Crossmedia.az-a açıqlama verib.
Onun sözlərinə görə, bu qərar Azərbaycanın Afrika strategiyasında yeni mərhələnin başlandığını göstərir: "Bu, yalnız diplomatik əlaqələrin qurulması ilə kifayətlənmir, eyni zamanda iqtisadi, humanitar və mədəni sahələrdə də sistemli əməkdaşlığa zəmin yaradır. Bu qərar Azərbaycanın qlobal siyasətdə daha balanslı, çoxqütblü və aktiv iştirakının əlaməti kimi dəyərləndirilə bilər. Keniyada səfirliyin açılması bir neçə əsas strateji məqsədə xidmət edir və geniş mənzərədə Azərbaycanın beynəlxalq diplomatik fəallığının artdığını göstərir. İlk növbədə, bu addım Afrika ilə diplomatik əlaqələrin gücləndirilməsi baxımından önəmlidir.
Afrika qitəsi 50-dən çox dövlətdən ibarətdir və bu ölkələr BMT-də geniş səs payına malikdir. Azərbaycan üçün bu ölkələrlə ikitərəfli münasibətləri inkişaf etdirmək, beynəlxalq təşkilatlarda qarşılıqlı dəstəyi gücləndirmək baxımından vacibdir”.
Siyasətçi əlavə edib ki, Keniyada səfirliyin fəaliyyətə başlaması bu istiqamətdə konkret mexanizmlərin qurulmasına imkan verəcək: "Keniyada səfirliyin açılması həm də iqtisadi və ticarət əlaqələrinin genişləndirilməsi baxımından böyük əhəmiyyət daşıyır. O qeyd edib ki, Keniya Şərqi Afrikanın ən mühüm iqtisadi mərkəzlərindən biridir və bu ölkə vasitəsilə Azərbaycan digər Afrika ölkələrinə çıxış imkanı əldə edə bilər. Kənd təsərrüfatı, enerji, nəqliyyat, informasiya texnologiyaları və səhiyyə kimi sahələrdə əməkdaşlıq potensialı mövcuddur: “Səfirlik bu əlaqələrin qurulması üçün həm siyasi, həm də praktiki baxımdan körpü rolunu oynaya bilər”.
Bundan əlavə, deputat Qlobal Cənub ölkələri ilə həmrəylik amilinə də toxunub. Onun sözlərinə görə, Azərbaycan son illərdə Qoşulmama Hərəkatı çərçivəsində inkişaf etməkdə olan ölkələrlə, xüsusilə də Afrika dövlətləri ilə əməkdaşlığa böyük önəm verir: " Keniyada səfirliyin açılması bu həmrəyliyi praktik müstəviyə daşımaq üçün konkret addımdır. Humanitar və təhsil sahəsində əməkdaşlıq da bu münasibətlərin vacib istiqamətlərindəndir. Azərbaycan indiyədək bir neçə Afrika ölkəsinə humanitar yardım göstərib və müxtəlif təhsil proqramları çərçivəsində afrikalı tələbələrə təqaüdlər təqdim edib. Bu səylərin davam etdirilməsi və daha koordinasiyalı aparılması üçün Keniyadakı səfirlik mühüm rol oynaya bilər".
Parıamentari vurğulayıb ki, informasiya və təsir siyasəti də bu kontekstdə unudulmamalıdır: " Afrikada Azərbaycan haqqında məlumatlılıq səviyyəsi aşağıdır. Yeni səfirlik bu boşluğu doldura, Azərbaycanın mövqelərini – xüsusilə Qarabağ məsələsində ədalətli yanaşmasını – daha geniş auditoriyaya çatdıra bilər. Belə bir qərarın qəbul edilməsini alqışlanmalıdır. Azərbaycan – Cibuti parlamentlərarası əlaqələr üzrə işçi qrupunun rəhbəri olaraq, belə bir qərardan hədsiz məmnunluq hissi keçirir və Azərbaycanla Afrika ölkələri arasında davamlı uğurlara imza atılacağına inanıram”.
Fatimə Nəbiyeva
11:01 05.06.2025
Oxunuş sayı: 11828
