Bəhram Aşrəfxanov: “İkitərəfli münasibətlərimiz yeni mərhələyə qədəm qoyub”
Özbəkistanın Azərbaycandakı fövqəladə və səlahiyyətli səfiri Bəhram Aşrəfxanov Bakıda keçirilən Azərbaycan-Özbəkistan Ekspertlər Şurasının iclasında çıxış edib.
Crossmedia.az xəbər verir ki, diplomatın dediyinə görə, ekspert şurasının bu formatda fəaliyyəti ölkələr arasında əməkdaşlığın əsas istiqamətlərini – aqrar-sənaye kooperasiyası, yaşıl enerji, nəqliyyat və logistika, eləcə də elmi və təhsil sahəsində insan kapitalının inkişafını əhatə edir.
Bəhram Aşrəfxanovun sözlərinə görə, Azərbaycanla əlaqələrin hərtərəfli inkişafı Özbəkistanın xarici siyasət prioritetləri sırasındadır. O qeyd edib ki, Prezident İlham Əliyevin rəhbərliyi ilə həyata keçirilən islahatlar, Azərbaycanın beynəlxalq nüfuzunun artması və regiondakı siyasi proseslərdə fəal iştirakı Özbəkistanda yüksək qiymətləndirilir.
Səfir vurğulayıb ki, işğaldan azad edilmiş ərazilərin bərpası və tarixi ədalətin bərqərar olunması bütün türk dünyası üçün əhəmiyyətlidir və Özbəkistan xalqı bu hadisələri böyük qürur hissi ilə qarşılayıb.
O, ikitərəfli hüquqi bazanın artıq 200-dən çox sənədi əhatə etdiyini, ən mühüm sənədlərdən birinin isə 2023-cü ilin avqustunda imzalanmış Müttəfiqlik münasibətləri haqqında saziş olduğunu qeyd edib.
Diplomat onu da diqqətə çatdırıb ki, Azərbaycan və Özbəkistan BMT, Qoşulmama Hərəkatı, Türk Dövlətləri Təşkilatı və digər beynəlxalq qurumlar çərçivəsində də bir-birini dəstəkləyir. 2025-ci ilin “İqtisadi Kooperasiya İli” elan edilməsi bu istiqamətdə növbəti addım olacaq.
Ticarət əlaqələrinə toxunan səfir son 5 ildə dövriyyənin üç dəfə artaraq 255 milyon dollara çatdığını bildirib. Hədəf bu göstəricini 1 milyard dollara çatdırmaqdır. Həmçinin, Özbəkistanda 240 Azərbaycan şirkəti, Azərbaycanda isə 70 Özbəkistan kapitallı müəssisə fəaliyyət göstərir.
Bəhram Aşrəfxanov deyib ki, birgə avtomobil istehsalı, tekstil, ipəkçilik, qızıl və gipskarton sahələrində layihələr reallaşdırılır. Yaşıl enerjinin birgə istehsalı və Avropaya ixracı sahəsində əməkdaşlıq isə strateji istiqamətlərdəndir.
Diplomat qeyd edib ki, Nizami Gəncəvi və Əlişir Nəvainin yubileyləri, Heydər Əliyevin 100 illiyi və digər mədəni-humanitar tədbirlər də münasibətlərin dərinləşməsinə xidmət edir. Artıq iki ölkənin 11 şəhəri arasında qardaşlaşma sazişləri mövcuddur.
Sonda səfir əminliklə bildirib ki, liderlərin siyasi iradəsi nəticəsində ikitərəfli münasibətlər 2025-ci ildə daha da inkişaf edəcək.
Sonda iclasın moderatoru Fərid Şəfiyev, tədbirin qapalı müzakirə formatında davam etdiriləcəyini bildirib və media nümayəbdələri zalı tərk ediblər.
Fatimə Nəbiyeva
15:51 04.06.2025
Oxunuş sayı: 927
