Eldar Əlipov: “Münasibətlərimiz tarixdə görünməmiş səviyyəyə çatıb"
Bu gün Beynəlxalq Münasibətlərin Təhlili Mərkəzində, BMTM və Özbəkistan Respublikasının Prezident yanında Strateji və Regionlararası Tədqiqatlar İnstitutunun birgə təşkilatçılığı ilə Azərbaycan-Özbəkistan Ekspert Şurasının ikinci iclası keçirilib.
Crossmedia.az xəbər verir ki , iclasda çıxış edən, Özbəkistan Respublikası Prezidenti yanında Strateji və Regionlararası Tədqiqatlar İnstitutunun direktoru Eldar Əlipov Azərbaycan tərəfinə səmimi qəbula və tədbirin yüksək səviyyədə təşkilinə görə təşəkkür edib.
E.Əlipov bildirib ki, bu formatda görüş ilk dəfədir ki, canlı şəkildə keçirilir. O, bu təşəbbüsün gələcəkdə də davamlı və mütəmadi əsasda reallaşacağına ümid etdiyini deyib. Ekspertlər Şurasının regionda baş verən prosesləri birgə müzakirə etmək, yeni təkliflər formalaşdırmaq və əməkdaşlığı genişləndirmək baxımından əhəmiyyətli platforma olduğunu vurğulayıb.
O, çıxışı zamanı bildirib ki, son dövrlərdə Mərkəzi Asiyada bir sıra əhəmiyyətli proseslər baş verir. O cümlədən, Özbəkistan, Qırğızıstan və Tacikistan arasında imzalanmış Xucand razılaşması Fərqanə vadisindəki sərhəd mübahisələrinin həllində mühüm rol oynayıb. Əvvəllər gərginlik mənbəyi olan region bu gün qarşılıqlı anlaşma və əməkdaşlıq məkanına çevrilməkdədir.
Eldar Əlipov həmçinin qeyd edib ki, Azərbaycan və Özbəkistan prezidentləri arasında yüksək səviyyəli dialoq bu tərəfdaşlığın əsasını təşkil edir. Onun sözlərinə görə, son illərdə iki ölkə arasında qarşılıqlı səfərlərin sayı 150-yə yaxınlaşıb və bu dinamika münasibətlərin möhkəmlənməsinə səbəb olub.
O, Azərbaycan və Özbəkistan arasında ticarət dövriyyəsinin son 8 ildə 8 dəfə artdığını, birgə müəssisələrin sayının isə 5 dəfə çoxaldığını diqqətə çatdırıb. “Bu gün biz yalnız mal dövriyyəsini artırmırıq, eyni zamanda sənaye kooperasiyasını da genişləndiririk” – deyə o bildirib. Əlipov onu da qeyd edib ki, iki ölkə birgə avtomobil istehsalı, tekstil və ipəkçilik sahələrində layihələr həyata keçirir.
Strateji əməkdaşlıq istiqamətlərindən biri kimi “yaşıl enerji” sahəsində əməkdaşlığı qeyd edən Əlipov bildirib ki, alternativ enerji sahəsində ortaq istehsal və texnologiya mübadiləsi gələcək üçün geniş imkanlar vəd edir.
Eldar Əlipov çıxışında Azərbaycan tranzit potensialının Özbəkistan üçün strateji əhəmiyyət daşıdığını da xüsusi vurğulayıb. Onun sözlərinə görə, son dörd ildə Özbəkistandan yüklərin Azərbaycan üzərindən daşınması 5 dəfə artıb və 2024-cü ildə bu rəqəm 1 milyon tona çatıb. O, həmçinin Çin–Qırğızıstan–Özbəkistan dəmir yolu layihəsi və trans-Afqan nəqliyyat dəhlizlərinin Azərbaycan üçün də maraqlı ola biləcəyini qeyd edib.
Çıxışının sonunda Eldar Əlipov Azərbaycan və Özbəkistan arasında ikitərəfli və regional əməkdaşlığın genişlənəcəyinə ümid etdiyini bildirib və görüş iştirakçılarına uğurlar arzulayıb.
Fatimə Nəbiyeva
12:50 04.06.2025
Oxunuş sayı: 6270
