TƏCİLİ: Azərbaycan və Ermənistan nümayəndələri görüşdü - Nəticə nə olacaq?
Birinci Qarabağ müharibəsindən sonra Azərbaycanın dörd mindən çox vətəndaşı – əsasən hərbçilər – itkin düşmüş hesab olunur. Bu şəxslərin taleyinə aydınlıq gətirilməsi illərdir həm Azərbaycan cəmiyyətini narahat edir, həm də regional sülh üçün zəruri addım kimi qiymətləndirilir. Bu kontekstdə Azərbaycan və Ermənistanın itkin düşmüş şəxslər üzrə dövlət komissiyalarının nümayəndələri arasında keçirilən son görüş mövzunu yenidən gündəmə gəlib.
Milli Məclisin deputatı Arzuxan Əlizadə məsələ ilə bağlı Crossmedia.az-a açıqlamasında qeyd edib ki, Ermənistan tərəfi uzun illər ərzində itkinlərlə bağlı qeyri-konstruktiv mövqe sərgiləyib və Azərbaycan tərəfinin verdiyi rəsmi sorğulara baxmayaraq, məlumat verməkdən yayınırdı.
Deputatın sözlərinə görə, Azərbaycan əraziləri işğaldan azad edildikdən sonra bir neçə kütləvi məzarlıq aşkar olunub və həmin məzarlıqlarda insanlığa zidd şəkildə qətlə yetirilmiş şəxslər dəfn olunub. Bu isə itkin düşmüş şəxslərin taleyinə qismən də olsa aydınlıq gətirir.
“Əgər bu təmaslar bir nəfərin belə taleyinə aydınlıq gətirəcəksə, bu özü də yaxşı haldır. Bu baxımdan təmaslar davam etməlidir, dövlət komissiyaları arasında müzakirələr və faktların üzə çıxarılması prosesi dayanmamalıdır”,– deyə deputat Arzuxan Əlizadə bildirib.
Eyni zamanda o qeyd edib ki, Ermənistanın bu məsələdə səmimi və şəffaf mövqe sərgiləyəcəyinə dair nikbinlik üçün ciddi əsaslar yoxdur. Çünki həmin şəxslərin əksəriyyəti ermənilər tərəfindən qətlə yetirilib və bu faktları ört-basdır etmək məqsədilə qarşı tərəf məlumat verməkdən çəkinir.
Zəhra Ağayeva
12:20 04.06.2025
Oxunuş sayı: 16728
