“Mərkəzi Asiya+Azərbaycan” formatı həm siyasi, həm də iqtisadi baxımdan strateji əhəmiyyət kəsb edir
Bu gün Beynəlxalq Münasibətlərin Təhlili Mərkəzində Azərbaycan–Özbəkistan Ekspertlər Şurasının ikinci iclası baş tutub. İclasda hər iki ölkənin diplomatik nümayəndələri, ekspertləri və rəsmi şəxsləri iştirak ediblər.
Crossmedia.az xəbər verir ki, tədbirin açılış çıxışını, iclasa moderatorluq edən, Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev edib. O, qeyd edib ki, Ekspertlər Şurasının fəaliyyət istiqamətləri artıq davamlı əməkdaşlığın vacib elementinə çevrilib. Onun sözlərinə görə, bu günədək təşkil olunan tədbirlərin əksəriyyəti onlayn formatda gerçəkləşsə də, Bakıda baş tutan budəfəki görüş canlı dialoq üçün xüsusi imkan yaradıb.
F.Şəfiyev bildirib ki, Özbəkistan Azərbaycanın ərazi bütövlüyünü hər zaman prinsipial şəkildə dəstəkləyən ölkələrdən biri olub: "44 günlük Vətən müharibəsindən sonra Azərbaycanın ərazi bütövlüyünün bərpası münasibətilə Özbəkistan bizə ilk təbrik göndərən ölkələrdən oldu. Biz bu dəstəyi unutmuruq və yüksək qiymətləndiririk".
O, həmçinin Özbəkistanın yalnız sözlə deyil, əməli dəstəyindən də danışıb. O, azad edilmiş ərazilərdə bu ölkə tərəfindən inşa edilən və fəaliyyət göstərən məktəbi bu baxımdan xüsusi vurğulayıb.
Sədr çıxışında qeyd edib ki, Azərbaycan–Özbəkistan münasibətləri artıq ikitərəfli əməkdaşlıq çərçivəsindən çıxaraq, region üçün geosiyasi əhəmiyyət kəsb edir. Bu əlaqələrin həm Mərkəzi Asiyada, həm də Cənubi Qafqazda mühüm təsiri olduğunu bildirib.
Tərəflər arasında diplomatik həmrəylikdən söz açan Fərid Şəfiyev vurğulayıb ki, hər iki ölkə Qoşulmama Hərəkatının üzvüdür. Xatırladıb ki, 2027-ci ildə bu təşkilata Özbəkistan sədrlik edəcək və bu qərar Azərbaycanın sədrliyi dövründə dəstəklənib.
Türk Dövlətləri Təşkilatındakı əməkdaşlıq da çıxışda xüsusi yer alıb. Bildirilib ki, Azərbaycan və Özbəkistan bu birlikdə önəmli rol oynayır və münasibətləri türk dünyasının birliyini irəli aparan əsas qüvvələrdən biridir.
F.Şəfiyev, iyul ayında Bakıda keçiriləcək İqtisadi Əməkdaşlıq Təşkilatının növbəti sammitini də gündəmə gətirib. Bunun, ölkələr arasında iqtisadi inteqrasiyanın güclənməsi baxımından əhəmiyyətli platforma olduğunu qeyd edib.
Natiq çıxışında Özbəkistan Prezidenti Şavkat Mirziyoyevin regionda apardığı siyasətin Xəzər və Mərkəzi Asiyada əməkdaşlığa ciddi töhfə verdiyini xüsusi vurğulayıb. Onun sözlərinə görə, enerji və nəqliyyat sahəsində imzalanmış üçtərəfli memorandum (Azərbaycan–Qazaxıstan–Özbəkistan) bu inteqrasiyanın bariz nümunəsidir.
Sədr çıxışında “Mərkəzi Asiya + Azərbaycan” formatını da xatırladıb. Bu əməkdaşlıq modelinin həm siyasi, həm də iqtisadi baxımdan strateji əhəmiyyət kəsb etdiyi bildirib.
Fərid Şəfiyev, regionda gərginliklərin azaldılması istiqamətində atılan addımları da qiymətləndirib. Özbəkistan və Qazaxıstan arasında imzalanan saziş və Tacikistan–Qırğızıstan münasibətlərindəki irəliləyişləri nümunə kimi göstərib.
Nəhayət, çıxışda Azərbaycan və Özbəkistan prezidentləri arasında formalaşmış səmimi münasibətlərin bütün bu əməkdaşlığın əsasını təşkil etdiyini qeyd edib. Bildirib ki, bu münasibətlər üzərində qurulan strateji tərəfdaşlıq gələcəkdə də regionda sabitlik və inkişaf üçün mühüm rol oynayacaq.
Fatimə Nəbiyeva
12:13 04.06.2025
Oxunuş sayı: 1076
