Deputat: "Dağlar belə Azərbaycan dövlətinin, xalqının iradəsi qarşısında duruş gətirə bilmir"
"İşğaldan azad edilmiş torpaqlarımıza qayıdış bu torpaqların işğalına son qoyulduğu gündən başlayıb. Azərbaycanlılar öz tarixi yurd yerlərinə Ali Baş Komandanın iti zəkası və qətiyyəti, şəhidlərin qanı, əsgər çəkmələrinin izləri ilə qayıdıblar. İndi isə bu proses vəhşi, qaniçən, vandal tayfanın viran qoyduğu yurd yerlərimizdə həyata keçirilən genişmiqyaslı bərpa-quruculuq işləriylə, misilsiz bir sürət və böyük Vətən sevgisinə bürünmüş yüksək peşəkarlıqla davam etdirilir".
Bunu Crossmedia.az-ın siyasi partiya rəhbərlərinin işğaldan azad olunmuş ərazilərə səfəri ilə bağlı əraziyə ezam olunan əməkdaşına açıqlamasında Milli Məclisin deputatı Elçin Mirzəbəyli deyib.
"Proses o qədər sürətlə və mükəmməl bir şəkildə, həm də strateji planlama ilə aparılır ki, qürur duymamaq mümkün deyil. Dövlətimizin idrakı da, yaradıcılıq potensialı da qolu qədər güclüdür. Məhz bu baxımdan, Şərqi Zəngəzurun, Qarabağın tezliklə hər köşəsində azərbaycanlıların isti, doğma nəfəsinin duyulacağına şübhə etmirəm. Bir müddət öncə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin təşkilatçılığı ilə Xankəndiyə, Laçına, bu gün isə Füzuli, Cəbrayıl və Zəngilana səfərimiz zamanı yol boyu işğaldan azad edilmiş torpaqlarımızın nəhəng bir tikinti meydanını xatırlatdığının şahidi oluruq. Gördüklərimiz nağıl, əfsanə kimidi. Dağlar belə Azərbaycan dövlətinin, xalqının iradəsi, yurd sevgisi qarşısında duruş gətirə bilmir. Əlçatmaz ucalıqlardan yollar, tunellər çəkilir. Qarabağımız, Şərqi Zəngəzurumuz hər gün həm əzizlərinin, doğmalarının qayıdışına şahidlik edir və onlarla birlikdə özünə qayıdır, həm də müasir, güclü Azərbaycanın ayrılmaz bir parçası kimi Böyük Hədəflərə və gələcəyə doğru irəliləyir", - o bildirib.
Kənan Novruzov
21:07 03.06.2025
Oxunuş sayı: 5840
