Pakistan qaz ehtiyatlarının lokallaşdırılmasında göstərdiyi dəstəyə görə Azərbaycana təşəkkür edib
Pakistan qaz ehtiyatlarının lokallaşdırılması prosesində göstərdiyi yardım və dəstəyə görə Azərbaycana təşəkkürünü bildirib.
Crossmedia.az xəbər verir ki, bu barədə Pakistanın federal enerji naziri Əli Pərvaiz Malik bu gün keçirilən 30-cu Yubiley Bakı Enerji Forumunda bildirib.
Onun sözlərinə görə, son illərdə Pakistana qaz təchizatının əhəmiyyətli hissəsi dost ölkələr hesabına həyata keçirilib və hazırda ölkədə üç-dörd beynəlxalq müqavilə qüvvədədir.
"Daxili istehlaka gəlincə, milli valyutanın təzyiq altında olması və dünyada “Brent” markalı neftin qiymətlərinin artması fonunda tələb azalıb. Biz yeni müqavilələr bağlamazdan əvvəl mövcud sazişlərin yerinə yetirilməsinə diqqət yetiririk. Eyni zamanda, daxili kəşfiyyat və hasilatı stimullaşdırmaq üçün səy göstəririk", - nazir qeyd edib.
O, Pakistanın bu prosesdə Azərbaycanın dəstəyini yüksək qiymətləndirdiyini vurğulayıb:
"Mən Azərbaycan hökumətinə və bütün tərəfdaşlarımıza qaz ehtiyatlarının lokallaşdırılması məsələlərində yardım və dəstəyə görə minnətdaram. Bu, bizim qaz sektorunun idarə edilməsi üçün vacib elementdir".
Nazir həmçinin qeyd edib ki, Pakistanın enerji sistemində ən böyük qaz istehlakçısı elektrik enerjisi sektoru olaraq qalır.
"Məhz buna görə mən lap əvvəldən razılaşdırılmış enerji siyasətinin vacibliyini vurğulayıram. İstehlakın digər əsas seqmenti məişət sektorudur. Bizim təxminən 150 000 kilometr uzunluğunda qaz kəməri şəbəkəmiz var və milyonlarla ev təsərrüfatı ucuz enerjidən asılıdır. Biz məişət cihazları üçün enerji səmərəliliyi standartlarının tətbiqi üzərində işləyirik", - Ə.Malik əlavə edib. (report)
10:35 03.06.2025
Oxunuş sayı: 7839
