Deputat: "Əsrin müqaviləsi"nin nəticəsini bütün Azərbaycan xalqı öz həyatında görür"
Prezident İlham Əliyev 30-cu “Caspian Oil and Gas”, 13-cü “Caspian Power” və 30-cu “Baku Energy Forum”un rəsmi açılış mərasimində çıxışında deyib ki, 1994-cü ildə ilk sərgi təşkil olunmuşdur və həmin sərgidən dərhal sonra Azərbaycan beynəlxalq neft şirkətləri konsorsiumu ilə müqavilə bağladı: "Daha sonra bu, “Əsrin müqaviləsi” adlandırıldı. O, əslində, regionda geosiyasi və geoiqtisadi vəziyyəti dəyişdirdi.
“Bu, Prezident Heydər Əliyevin baxışına uyğun idi”, - deyə dövlət başçısı əlavə edib.
Azərbaycanın müasir siyasətində, beynəlxalq aləmdəki yerində "Əsrin müqaviləsi"nin rolu barədə Crossmedia.az-a danışan Milli Məclisin deputatı Tənzilə Rüstəmxanlı “Əsrin müqaviləsi”nin Azərbaycanın müasir tarixi üçün misilsiz əhəmiyyət kəsb etdiyini vurğulayıb: “Bütün dünyaya səs salan ‘Əsrin müqaviləsi’nin imzalanması ölkəmiz, xalqımız üçün mühüm tarixi hadisə, yüksək nailiyyət idi. Gənc Azərbaycan dövləti ilk dəfə olaraq müstəqil siyasət yeritmək iqtidarında olduğunu və öz yeraltı sərvətlərinə sahib çıxmasını dünyaya bəyan etdi. Heydər Əliyevin uzaqgörən siyasətinin nəticəsi olan "Əsrin müqaviləsi" Xəzər regionunu beynəlxalq əməkdaşlıq məkanına çevirdi.
T. Rüstəmxanlı əlavə edib ki, gənc, suveren Azərbaycan az müddətdə qlobal enerji layihələrinin təşəbbüskarı və əsas iştirakçısı kimi tanındı, ölkəmizin beynəlxalq nüfuzu xeyli artdı": " “Əsrin müqaviləsi”nin uğurla icra olunması ölkəmizi iqtisadi tənəzzüldən sürətli inkişaf yoluna çıxardı və Azərbaycana güclü xarici investisiya axını başladı. İşğaldan azad olunmuş ərazilərdə geniş bərpa-quruculuq işləri aparılır, düşmənin viran qoyduğu, xarabazara çevirdiyi torpaqlarda isə yeni şəhər, kənd və qəsəbələr salınır. Bunun nəticəsində Qarabağ və Şərqi Zəngəzurda həyat yenidən canlanır, insanlar doğma yurdlarına qayıdırlar. Azərbaycan bütün bu işləri heç bir beynəlxalq təşkilatdan, dünyanın hər hansı bir ölkəsindən yardım almadan öz gücü, maliyyə potensialı vasitəsilə həyata keçirir".
Parlamentari işğaldan azad olunmuş ərazilərdə aparılan geniş bərpa-quruculuq işləri və yeni şəhər, kənd, qəsəbələrin salınması nəticəsində Qarabağ və Şərqi Zəngəzurda həyatın yenidən canlanmasını “Əsrin müqaviləsi”nin uğur hekayəsinin məntiqi nəticəsi hesab etdiyini bildirib: "Yəni, bu inkişaf və canlanma müqavilənin ölkəyə gətirdiyi uğurun təbii davamıdır. Prezident İlham Əliyevin söylədiyi kimi, "Əsrin müqaviləsi" Ulu öndərin Azərbaycan xalqı qarşısında misilsiz xidmətlərindən biridir. Bu gün bütün Azərbaycan xalqının bu kontraktın gözəl nəticələrini öz həyatında gördüyünü bildirib".
Fatimə Nəbiyeva
16:30 02.06.2025
Oxunuş sayı: 1253
