Qlobal Cənub QHT Platformasının yaranması fövqəladə hadisədir - AÇIQLAMA
İnkişaf etməkdə olan ölkələrin qlobal arenada daha güclü mövqe tutması və onların maraqlarının beynəlxalq səviyyədə müdafiə edilməsi müasir dövrün ən vacib məsələlərindən biridir. Bu baxımdan, Qlobal Cənub QHT Platformasının yaranması mühüm bir addımdır. Platforma Cənub ölkələrinin vətəndaş cəmiyyətlərini bir araya gətirərək, onların səylərini əlaqələndirmək və sosial, iqtisadi, ekoloji problemlərə qarşı birgə həll yolları tapmaq məqsədilə yaradılıb.
Mövzu ilə bağlı Crossmedia.az-a açıqlama verən, Beynəlxalq Avrasiya Mətbuat Fondunun sədri Umud Rəhimoğlu ilk olaraq bildirib ki, Qlobal Cənub QHT Platforması bir ideya olaraq unikal bir məsələdir:
“Platforma aprel ayında formalaşıb. Bildiyiniz kimi, dünya miqyasında çoxsaylı platformalar mövcuddur. Onların böyük əksəriyyəti ya ABŞ-dən, ya Avropa ölkələrindən, ya da qlobal təşkilatların təşəbbüsü ilə yaranıb. Bu platformalarda təmsil olunan vətəndaş cəmiyyəti qurumlarının böyük əksəriyyəti inkişaf etmiş ölkələrdəndir. Lakin Qlobal Cənub ölkələrinə mənsub QHT-lər beynəlxalq səhnədə həm say baxımından, həm mövqe etibarilə, həm də bacarıqları baxımından ən aşağı səviyyədədir. Bu səbəbdən BMT, Avropa Birliyi və digər beynəlxalq təşkilatlarda daha çox bu cür təşkilatların mövqeyi dominantdır. Bu bölgəyə aid olan QHT-lər isə ikinci, üçüncü dərəcəli təşkilatlar idi və onların nüfuzu kifayət qədər zəif idi. Bu səbəbdən Qlobal Cənuba aid QHT təşkilatları beynəlxalq səhnədə kifayət qədər güclü mövqe qazana bilməyib. Bir sıra mövcud platformalar müxtəlif siyasi sifarişlər yerinə yetirməklə neytrallıqlarını itirib və etibarlarını zəiflədib”.
U.Rəhimoğlunun sözlərinə görə, belə bir platformanın yaranması fövqəladə hadisədir:
“Onun Azərbaycanda yaranması isə ayrıca önəm daşıyır. Bu platformanın daha da mükəmməl olması üçün Azərbaycan rəhbərlik edir. Onun formalaşmasında ölkənin vətəndaş cəmiyyəti mənsubu Ramil İsgəndərli bu prosesləri yönəldir. Hesab edirəm ki, bu platformanın uğurla inkişafı üçün zəruri addımlar atılacaq. Rəhbəri olduğum Beynəlxalq Avrasiya Mətbuat Fondu bu forumun keçirilməsində, şəbəkənin formalaşmasında kifayət qədər aktiv yer alan təşkilatlardan biridir. Baş tutan forum çərçivəsində 6 təşkilat arasında əməkdaşlıq haqqında sənəd imzalanıb. Onlardan biri də Beynəlxalq Avrasiya Mətbuat Fondu idi. Biz Ərəb Platformasının prezidenti Kamel Esseghairi ilə uzun illərdir bir-birimizi tanıyırıq və bu platformanın formalaşmasında ilkin gündən dəstək verən qurumlardan biridir. Forum çərçivəsində də əməkdaşlıq protokolu imzaladıq və aprel ayının sonlarında forum baş tutub. İyun ayında Kamel Esseghairinin Azərbaycana səfəri planlaşdırılır. Bu çərçivədə bizim xeyli planlaşdırdığımız işlər var və düşünürük ki, Qlobal COP30-la bağlı Qlobal Cənub QHT Platformasının fəal şəkildə proseslərə qatılmasında iştirak edək. Ümumiyyətlə, növbəti illərdə əməkdaşlıqlarımız daha da genişlənəcək və ciddi təşəbbüslər həyata keçiriləcək. Biz bu istiqamətdə fəaliyyətimizi davam etdirəcəyik”.
Nəzrin Salmanova
16:04 30.05.2025
Oxunuş sayı: 15914
