Səməd Seyidov: "Zəngəzur dəhlizi artıq var"- Yeni reallıq
Türkiyə Prezidenti Rəcəb Tayyib Ərdoğan Azərbaycandan qayıdarkən təyyarədə jurnalistlərə açıqlaması zamanı deyib ki, Zəngəzur dəhlizi Azərbaycan üçün Naxçıvanla quru əlaqəsi olmaqla yanaşı, həm də Türkiyə üzərindən türk dünyasına uzanan yeni inteqrasiya xəttidir.
Prezidentin sözlərinə görə, qısa müddətdə bu keçidin açılması Qafqazın nəqliyyat və enerji infrastrukturunu da gücləndirəcək:
"Biz qonşumuz İrandan bölgəmizdə sülhə, əmin-amanlığa və inkişafa xidmət edəcək bu addımları dəstəkləməsini gözləyirik. Biz istəyirik ki, bu mühitdən hamı faydalansın. Atılan hər addım, açılan hər qapı və dəhliz iqtisadi qazanc gətirəcək, ölkələri zamanla yaxınlaşdıracaq".
Məlum olduğu kimi, Zəngəzur dəhlizinin açılması Azərbaycanın regional xarici siyasətində mühüm istiqamətlərdəndir. Rəsmi Bakı bununla bağlı konkret mövqe ortaya qoyub. Ankara da Bakının bu mövqeyini dəstəkləyir. Lakin Ermənistan havadarlarının da dəstəyi ilə zaman- zaman destruktiv mövqe ortaya qoyur.
Zəngəzur dəhlizinin perspektivi barədə Crossmedia.az-a danışan Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycan Respublikasının Avropa Şurası Parlament Assambleyasındakı nümayəndə heyətinin rəhbəri Səməd Seyidov deyib ki, bu, kifayət qədər realdır: "Zəngəzur dəhlizi artıq var. Bu, bizim fikrimizdə, sözümüzdə, əməlimizdədir. Görülən işlər, atılan addımlar da bunu təsdiqləyir. XX əsrin əvvəlində ədalətsiz qərar nəticəsində Azərbaycan torpaqları Ermənistana verildi. Məqsəd türk dünyasını parçalamaq idi. Azərbaycan torpaqlarının Ermənistana verilməsi, əlbəttə, faciə idi".
Parlamentari söyləyib ki, Zəngəzur dəhlizinin açılması beynəlxalq hüququn, tarixin, məntiqin tələbidir: "Rəsmi Bakı ədalətsizliyin bərpasını istəyir. Bizim kimsənin ərazi bütövlüyündə gözümüz yoxdur. Və, ümumiyyətlə, Zəngəzur dəhlizi Azərbaycanın Ermənistana ərazi bütövlüyünə müdaxiləsi kimi qiymətləndirilməməlidir. Biz dediyim kimi, beynəlxalq hüququn bərpa olunmasını istəyirik".
Deputat Ermənistanın mövqeyi barədə də danışıb: "Qarşı tərəf destruktiv mövqeyini getdikcə yumşaldır. Başqa yolu da yoxdur. Prezident İlham Əliyevin dediyi kimi, Ermənistan regionda yad element olmaq istəmirsə, Azərbaycanın mövqeyini qəbul etməlidir. Çünki rəsmi Bakı adi oyunçu deyil, güc mərkəzidir. Azərbaycan olmadan heç bir region ölkəsi inkişaf edə bilməz".
Kənan Novruzov
16:16 29.05.2025
Oxunuş sayı: 766
