"Ermənistanın dezinformasiyaları sülh prosesini gecikdirir" - Deputat
Azərbaycan Ordusu Xəznəvar yaşayış məntəqəsi istiqamətində atəş açılması barədə Ermənistan Müdafiə Nazirliyinin məlumatını təkzib edib. Müdafiə Nazirliyi bunu məqsədyönlü dezinformasiya adlandırır. Bildirilir ki, Azərbaycan Ordusu mülki əhaliyə və obyektlərə heç vaxt atəş açmır. Qarşı tərəfin yaydığı yalan məlumatlar beynəlxalq ictimaiyyətdə yanlış təəssürat yaratmaq məqsədi daşıyır. Vəziyyət tam nəzarət altındadır və yalan məlumatlar əsassızdır.
Mövzu ilə bağlı Crossmedia.az-a olan açıqlamasında Milli Məclisin deputatı Arzuxan Əlizadə Ermənistanın yaydığı dezinformasiya xarakterli məlumatların ilk olmadığını və bunun son da olmayacağını bildirib. A.Əlizadənin sözlərinə görə, Ermənistan bu cür məlumatları yaymaqla sərhəddə Azərbaycanın atəşkəsi pozması və Ermənistan tərəfə atəş açılması barədə yalan informasiyalar yayır. Deputat, "Ermənistanın öz ağalarının tapşırıqlarını yerinə yetirməsidir"- deyə bildirib.
O vurğulayıb ki, “bu tapşırıqların məqsədi Azərbaycanı beynəlxalq ictimaiyyətin gözündə sülh müqaviləsi imzalamaqda maraqlı olmayan və destruktiv mövqe tutan tərəf kimi göstərməkdir". Arzuxan Əlizadə bildirib ki, sülh müqaviləsinin imzalanmasının ertələnməsi Ermənistanı dəstəkləyən qüvvələrin maraqlarına uyğundur və bu qüvvələr regionda öz maraqlarını təmin etmək məqsədi güdürlər.
Deputat əlavə edib ki, hazırkı qüvvələr nisbətində sülh müqaviləsinin tez imzalanması mümkün deyil və buna görə də Ermənistanın sülh prosesini gecikdirməyə çalışması təbii haldır. A.Əlizadə deyib ki, Ermənistan özü dəfələrlə sərhəddə atəşkəsi pozub, təxribatçı addımlar atıb və bu siyasət davam edir. O əlavə edib ki, bu kimi addımlar bölgədə normal mühitin formalaşmasına mane olur.
Deputat vurğulayıb ki, bu cür mövqe sərgilənməsi sülh müqaviləsinin imzalanmasını gecikdirmək və bölgədə sabit və davamlı sülhün yaranmasının qarşısını almaq məqsədi daşıyır. Arzuxan Əlizadə əlavə edib: “Ermənistana havadarlıq edən güclər öz maraqlarını təmin etmək üçün bu prosesin uzanmasını hədəfləyir və Ermənistan tərəfi də bu tapşırıqları ‘məharətlə’ icra edir".
Bu açıqlamalardan aydın olur ki, Ermənistanın davamlı olaraq yaydığı dezinformasiyalar və sərhəddə atəşkəs rejimini pozması regional sülh prosesinə ciddi zərbə vurur və Azərbaycanın beynəlxalq aləmdəki mövqeyini çətinləşdirir. Deputatın sözlərinə görə, bu hal yalnız sülhün gecikməsinə yox, həm də bölgədə uzunmüddətli sabitliyin yaranmasının qarşısının alınmasına xidmət edir.
Fatimə Nəbiyeva
14:04 29.05.2025
Oxunuş sayı: 28643
